ក្រុមហ៊ុន Samsung ត្រូវបានគេរាយការណ៍ថា នឹងចេញលក់ស្មាតហ្វូនដែលមានកម្រាស់ស្តើងជាងគេរបស់ខ្លួនគឺ Galaxy S25 Slim នៅក្នុងប្រទេសមួយចំនួនប៉ុណ្ណោះ ពោលគឺកំណត់តាមភូមិសាស្ត្រ ដោយមានលក់ត្រឹម ៣៩ ប្រទេស និងតំបន់តែប៉ុណ្ណោះ។
បញ្ជីប្រទេសនិងតំបន់ទាំងនេះ រួមមាន អាហ្វហ្គានីស្ថាន អូស្ត្រាលី អូទ្រីស ប្រេស៊ីល ក្រូអាត អេហ្ស៊ីប បារាំង ឥណ្ឌា អ៊ីរ៉ាក់ អៀរឡង់ អ៊ីស្រាអែល កាហ្សាក់ស្ថាន កេនយ៉ា លីប៊ី ម៉ាឡេស៊ី ម៉ិកស៊ិក ម៉ុងតេណេហ្គ្រោ ម៉ារ៉ុក នីហ្សេរីយ៉ា ប៉ាគីស្ថាន ហ្វីលីពីន ប៉ូឡូញ ព័រទុយហ្គាល់ រុស្ស៊ី អារ៉ាប៊ីសាអូឌីត សេណេហ្គាល់ ស៊ែប៊ី សិង្ហបុរី ស្លូវេនី ខាងត្បូងអាហ្រ្វិក ស្រីលង្កា ស្វីស ថៃ ទុយនីស៊ី ទួរគី អារ៉ាប់រួម អ៊ូសបេគីស្ថាន និងវៀតណាម។ ក៏ប៉ុន្តែទីផ្សារសំខាន់ៗដូចជា សហរដ្ឋអាមេរិក កាណាដា ប្រទេសចិន អាឡឺម៉ង់ អ៊ីតាលី អេស្ប៉ាញ និងកូរ៉េមិនបានបញ្ចូលក្នុងបញ្ជីនោះទេ។
គួរបញ្ជាក់ថា ស្មាតហ្វូនដែលមានកម្រាស់ស្តើងជាងគេរបស់ Samsung គឺ Galaxy S25 Slim អាចនឹងមានកម្រាស់ 6.4mm ដែលធ្វើឱ្យវាស្តើងបំផុតក្នុងត្រកូល S25 ហើយអាចនឹងមានលក់នៅចុងឆ្នាំ២០២៥ នេះ បន្ទាប់ពីការចេញផ្សាយ Galaxy S25, S25+ និង S25 Ultra។
គួរឲដឹងថា ការសម្រេចចិត្តនេះ អាចនឹងមានទាក់ទងទៅនឹងការស្រាវជ្រាវទីផ្សារផ្ទាល់របស់ Samsung ដែលលើកឡើងថាមានតែប្រជាជននៅតំបន់ដែលបានបញ្ជាក់ប៉ុណ្ណោះដែលមានសមត្ថភាពទិញ ឫក៏នឹងទិញ Galaxy S25 Slim យកមកប្រើប្រាស់៕