ក្រុមហ៊ុនផលិតទូរស័ព្ទដៃ nubia បានប្រកាសដាក់បង្ហាញចេញជាផ្លូវការនូវទូរស័ព្ទដៃសេរ៊ីថ្មី nubia Flip 2 ដែលជាទូរស័ព្ទដៃអាចបត់អេក្រង់បាន ជាមួយតម្លៃលក់ចាប់ពី ៤១១ ដុល្លារ ក្នុងទីផ្សារប្រទេសជប៉ុនជាដំបូង ខណៈទីផ្សារផ្សេងៗនឹងមានបន្តបន្ទាន់ក្នុងពេលឆាប់ៗនេះ។
ទូរស័ព្ទដៃ nubia Flip 2 ទទួលបានអេក្រង់ខាងក្រៅ AMOLED ទំហំ ៣ អ៊ីញ 120Hz មានកម្រិតបង្ហាញ 422 x 682 pixels ចំណែកអេក្រង់ខាងក្នុងជាប្រភេទ AMOLED ដូចគ្នា មានទំហំ ៦,៩ អ៊ីញ 120Hz មានកម្រិតបង្ហាញ FHD+ (2790 x 1188 pixels) ដំណើរការដោយបន្ទះឈីប MediaTek Dimensity 7300X ទំហំ 4nm ជាមួយប្រព័ន្ធប្រតិបត្តិការ Android 14 និងទទួលបាន RAM 6GB និងអង្គផ្ទុក 128GB ព្រមទាំងប្រើប្រាស់សុីមបានចំនួន២ និងអាចស្កេនម្រាមដៃនៅផ្នែកចំហៀងបាន។
ពាណិជ្ជកម្ម
សម្រាប់ផ្នែកកាមេរ៉ាវិញ ទទួលបានកាម៉េរ៉ាគោលខាងក្រោយទំហំ 50MP មាន aperture f/1.59 បូករួមជាមួយលេនជំនួយទំហំ 2MP មាន aperture f/2.2 និងភ្លើង LED flash ខណៈកាមេរ៉ាផ្នែកខាងមុខមានទំហំ 32MP។ ចំណែកផ្នែកថាមពលថ្មទូរស័ព្ទដៃ nubia Flip 2 ទទួលបានថ្មទំហំ 4,300mAh គាំទ្រការសាក PD 3.0 ហើយ nubia អះអាងថា អាចសាកពី ០ ទៅ ១០០ភាគរយ ចំណាយពេល ៥៥ នាទីប៉ុណ្ណោះ។ លើសពីនេះ ក៏មានបំពាក់ជាមួយអាវការពារ IPX2 ប្រឆាំងនឹងការធ្លាក់ទឹក និង IP4X ការពារប្រឆាំងនឹងវត្ថុដែលមានអង្កត់ផ្ចិតលើសពី ១ មីលីម៉ែត្រ និងគាំទ្រការតភ្ជាប់ 5G, 4G VoLTE, Wi-Fi 6, Bluetooth 5.3, GPS, USB Type-C និង NFC ។
ចំពោះការរចនារបស់ទូរស័ព្ទដៃ nubia Flip 2 មានកម្រាស់ ៧,៥ ម.ម ពេលលាត និងកម្រាស់ ១៥,៨ ម.ម ពេលបត់ និងទម្ងន់ ១៩១ ក្រាម និងទទួលបានជម្រើសពណ៌ស ពណ៌ខ្មៅ និងពណ៌ខៀវ៕