ក្រុមហ៊ុន Samsung ត្រូវបានគេរាយការណ៍ថា នឹងប្រកាសចេញនូវស្មាតហ្វូនដែលមានកម្រាល់ស្តើងបំផុតរបស់ខ្លួនគឺ Galaxy S25 Slim នៅក្នុងត្រីមាសទី២ ក្នុងឆ្នាំ២០២៥ នេះ ពោលគឺអាចប្រកាសចេញនៅក្នុងខែមេសា ឬឧសភា នេះបើយោងតាម OnLeaks ។
ក្នុងនោះ ពួកគេបាននិយាយថា Galaxy S25 Slim នឹងមានការរចនារាងសំប៉ែតស្រដៀងគ្នា និងកាមេរ៉ាខាងក្រោយបីគ្រាប់ដូច S25+ ប៉ុន្តែមានកម្រាស់ស្តើងត្រឹមតែ 6.4mm ប៉ុណ្ណោះ បើធៀបនឹងកម្រាស់ 7.2mm របស់ Galaxy S25។
លើសពីនេះ របាយការណ៍នេះបាននិយាយបន្ថែមទៀតថា Galaxy S25 Slim នឹងមានវិមាត្រ 159 x 76 x 6.4mm ដែលធ្វើឱ្យវាខ្ពស់បន្តិច និងធំជាង S25+ ដែលមានវិមាត្រ 158.4 x 75.8 x 7.3mm ហើយនឹងទទួលបានអេក្រង់ 6.7 ឬ 6.8 អ៊ីញ តែប៉ុណ្ណោះ។
បើតាមការចុះបញ្ជី Benchmark បានបង្ហាញថា Galaxy S25 Slim នឹងប្រើប្រាស់នូវបន្ទះឈីប Snapdragon 8 Elite និង RAM 12GB ស្រដៀងទៅនឹងទូរសព្ទផ្សេងទៀតនៅក្នុងស៊េរី S25។ ម៉្យាងវិញទៀត Galaxy S25 Slim អាចនឹងមានថ្មចន្លោះពី 3,000mAh ទៅ 4,000mAh ប៉ុណ្ណោះ ព្រោះដើម្បីរក្សាកម្រាស់ស្តើងរបស់ស្មាតហ្វូន៕