ក្រុមហ៊ុនផលិតស្មាតហ្វូន POCO ត្រូវបានគេរាយការណ៍ថា កំពុងធ្វើការអភិវឌ្ឍន៍ស្មាតហ្វូន POCO F7 Series ចំនួន ២ម៉ូឌែលសម្រាប់ទីផ្សារពិភពលោក ដែលក្នុងនោះរួមមាន POCO F7 Pro និង POCO F7 Ultra នេះបើយោងតាមគេហទំព័រទូរគមនាគមន៍របស់ប្រទេសឥណ្ឌូនេស៊ី។
គួរបញ្ជាក់ថា គេហទំព័រទូរគមនាគមន៍ឥណ្ឌូនេស៊ីបានចុះបញ្ជីស្មាតហ្វូន POCO ថ្មីចំនួន២ ម៉ូឌែល មានលេខម៉ូដែល 24117RK2CG និង 24122RKC7G ។
ជាមួយគ្នានេះ បើយោងតាមពាក្យចចាមអារ៉ាមនៅលើគេហទំព័រនេះបានបង្ហាញថា POCO F7 Pro និង POCO F7 Ultra អាចជាកំណែកែប្រែឈ្មោះថ្មីរបស់ Redmi K80 និង Redmi K80 Pro តែប៉ុណ្ណោះ ដោយ F7 Pro ត្រូវបានគេរំពឹងថានឹងបំពាក់នូវបន្ទះឈីប Qualcomm Snapdragon 8 Gen 3 មានកាមេរ៉ាគោល 50MP, កាមេរ៉ា ultrawide 8MP និងកាមេរ៉ា selfie 20MP ។
ខណៈស្មាតហ្វូននេះ ក៏ទំនងជាមានថាមពលថ្ម 6,550mAh ជាមួយនឹងបច្ចេកវិទ្យាសាកល្បឿនលឿនកម្លាំង 90W ផងដែរ និងគាំទ្រការតភ្ជាប់ 5G, Bluetooth, Wi-Fi និង NFC។ លើសពីនេះ ទាំង Pro និង Ultra នឹងទទួលបាននូវអេក្រង់ OLED ទំហំ ៦,៦៧ អ៊ីញ ជាមួយនឹងកម្រិតភាពច្បាស់ 2K 120Hz ។
ផ្ទុយទៅវិញ POCO F7 Ultra នឹងភ្ជាប់មកជាមួយ Qualcomm Snapdragon 8 Elite រួមជាមួយនឹង HyperOS 2.0 ផ្អែកលើ Android 15។ ស្មាតហ្វូននេះនឹងមានកាមេរ៉ាគោលទំហំ 50MP, កាមេរ៉ា Ultrawide 32MP, លេន telephoto 50MP គាំទ្រការថត 2.5x Optical zoom និងកាមេរ៉ា Selfie 20MP ។ ខណៈថាមពលថ្មគឺតូចជាង F7 Pro ត្រឹមតែ 6,000mAh ប៉ុណ្ណោះ ជាមួយនឹងកម្លាំងសាកល្បឿនលឿន 120W ។
គួរឲដឹងថា ព័ត៌មានលម្អិតបន្ថែមទៀតនៃស្មាតហ្វូន POCO F7 Pro និង POCO F7 Ultra ត្រូវបានគេរំពឹងថានឹងត្រូវបានបង្ហាញជាផ្លូវការនៅពេលដែលការចេញលក់ខិតជិតមកដល់៕