ឆ្នាំ ២០២៥ នេះ នឹងក្លាយជាឆ្នាំដ៏ធំមួយសម្រាប់ឧបករណ៍ Apple SE ខណៈថ្មីៗនេះ ក្រុមហ៊ុន Apple ត្រូវបានរាយការណ៏ថា កំពុងធ្វើការលើ Apple Watch SE បន្ទាប់ផងដែរ ដែលវានឹងមកជាមួយនឹងរូបរាងថ្មី ផលិតពីតួប្លាស្ទិកដើម្បីរក្សាតម្លៃលក់ទាប។ ជាមួយគ្នានេះ Apple Watch SE ថ្មី ក៏អាចចេញមកជាមួយនឹងពណ៌ចម្រុះថ្មីៗផងដែរ ដើម្បីធ្វើឲ្យកាន់តែមានការចាប់អារម្មណ៍។
ម្យ៉ាងវិញទៀត ចំពោះ Apple Watch SE 2025 នឹងមកជាមួយនឹងការរចនាថ្មី ដែលមានលក្ខណៈសម្បត្តិប្រសើរជាងមុន រួមជាមួយការកែលម្អបច្ចេកវិទ្យាក្នុងការត្រួតពិនិត្យសុខភាពសម័យថ្មីផងដែរ។
បន្ថែមលើនេះ Apple Watch Series 11 និង Ultra 3 នឹងផ្ដោតលើការប្រើបច្ចេកវិទ្យាថ្មីៗ ដូចជា ការតភ្ជាប់ផ្កាយរណប និង 5G RedCap ក៏ដូចជាមុខងារវាស់សម្ពាធឈាមកម្រិតខ្ពស់ថ្មីសម្រាប់ជួយរំលឹកអំពីស្ថានភាពសុខភាពរបស់អ្នកប្រើប្រាស់។ និងចុងក្រោយ កាស AirPods ថ្មី ក៏នឹងមកជាមួយមុខងារផ្តោតលើសុខភាព ដូចជាការត្រួតពិនិត្យចង្វាក់បេះដូង និងកម្មវិធី AI ថ្មីៗសម្រាប់តាមដានសុខភាពផងដែរ៕