ក្រុមហ៊ុន Apple ត្រូវបានគេរាយការណ៏ថា អាចនឹងបញ្ជេញស្មាតហ្វូនដែលមានកម្រាស់ស្តើងបំផុតរបស់ពួកគេគឺ iphone 17 air នៅក្នុងខែកញ្ញា ខាងមុខនេះ ដើម្បីត្រៀមប្រកួតប្រជែងទីផ្សារជាមួយ Galaxy S25 Slim របស់ Samsung ដែលអាចនឹងប្រកាសចេញនៅពេលដំណាលគ្នានេះផងដែរ ជាមួយតម្លៃលក់ចាប់ពី ១ ២៩៩ ដុល្លារ នៅក្នុងទីផ្សារសហរដ្ឋអាមេរិក។
បើប្រៀបធៀបទៅនឹង iPhone 16 Plus និង iPhone 16 Pro , iPhone 17 Air នេះ នឹងមានកម្រាស់ស្ដើងជាង iPhone 16 Plus និង iPhone 16 Pro ប្រហែល ២០ភាគរយ ពោលគឺមានកម្រាស់ត្រឹមតែ 6 ចុច 25 មីលីម៉ែត្រ ប៉ុណ្ណោះ ធ្វើឱ្យវាក្លាយជាទូរស័ព្ទ iPhone ដែលមានកម្រាស់ស្ដើងជាងគេរបស់ Apple ។
មិនត្រឹមតែប៉ុណ្ណោះនោះទេ ស្មាតហ្វូនមួយនេះ ក៏នឹងទទួលបានការរចនាជាមួយស៊ុមអាលុយមីញ៉ូមផងដែរ ដើម្បីធ្វើឲវាកាន់តែមានទម្ងន់កាន់តែស្រាល និងកម្រាស់កាន់តែស្តើង។
ទៅលើផ្នែកអេក្រង់ iPhone 17 Air អាចនឹងទទួលបានអេក្រង់ ProMotion ទំហំ 6 ចុច 6 អ៊ីញ 120ហឺត ។ ចំណែកកម្លាំងម៉ាសុីនអាចនឹងប្រើបន្ទះឈីប A19 ទំហំ 3ណាណូម៉ែត្រ ដដែល ព្រោះការការអភិវឌ្ឈន័បន្ទះឈីបថ្មី ២ណាណូម៉ែត្ររបស់ពួកគេពុំទាន់ទទួលបានភាពជោគជ័យនៅឡើយទេ។
ចំណែកកាមេរ៉ាវិញ អាចនឹងមានកាមេរ៉ាក្រោយ 48Megapixel ដូចគ្នានឹង iPhone SE ឆ្នាំ 2025 ដែរ ខណៈកាមេរ៉ាមុខនឹងមានទំហំ 24 Megapixel ដើម្បីធ្វើឱ្យប្រសើរឡើងទៅលើការថតរូបសែលហ្វី និងវីដេអូ។
គួរបញ្ជាក់ថា iPhone 17 Air ត្រូវបានអះអាងថា នឹងដកការប្រើស៊ីមផ្ទាល់ចេញ ជំនួយមកវិញឲការប្រើប្រាស់ e SIM តែប៉ុណ្ណោះ ព្រមទាំងរួមបញ្ចូលនូវការប្រើប្រាស់ម៉ូដឹម 5G ផ្ទាល់របស់ Apple ឬ ម៉ូដឹម 5G របស់ Qualcomm អាស្រ័យលើការអភិវឌ្ឍជាក់ស្តែងរបស់ Apple ព្រោះម៉ូដឹម 5G របស់ Apple កំពុងប្រឈមនឹងបញ្ហាទាក់ទងជាមួយកំដៅ ខណៈថ្មីៗនេះ ក្រុមហ៊ុន Qualcomm បានបញ្ជាក់ថា ពួកគេនឹងបន្តផ្គត់ផ្គង់ម៉ូដឹមសម្រាប់ឧបករណ៍របស់ Apple រហូតដល់ឆ្នាំ 2026 ៕