បន្ទាប់ពីមានពាក្យចរចាមអារាមជាច្រើនអំពីស្មាតហ្វូនសេរ៊ីថ្មីរបស់ក្រុមហ៊ុន Samsung គឺ Samsung Galaxy S25 series ពេលនេះ ក្រុមហ៊ុនផ្ទាល់បានប្រកាសចេញនូវកាលបរិច្ឆេទព្រឹត្តិការណ៍ Galaxy Unpacked ឆ្នាំ២០២៥ ជាផ្លូវការហើយ ដែលនឹងប្រារព្ធឡើងនៅថ្ងៃទី 23 ខែមករា វេលាម៉ោង 1 ទាបភ្លឺ ម៉ោងនៅកម្ពុជា តាមរយៈប្រព័ន្ធផ្សព្វផ្សាយសង្គម រួមទាំង YouTube ផងដែរ ។ ខណៈព្រឹត្តិការណ៍ផ្ទាល់នឹងធ្វើឡើងនៅទីក្រុង San Jose ក្នុងរដ្ឋ California ។
ជាមួយគ្នានេះ ព្រឹត្តិការណ៍ Galaxy Unpacked ឆ្នាំ២០២៥ នេះ ត្រូវបានរំពឹងថា នឹងណែនាំនូវស្មាតហ្វូនសេរ៊ីថ្មីចំនួន ៣ម៉ូឌែល ដែលជាស្មាតហ្វូនស្ថិតក្នុងត្រកូល S រួមមាន Galaxy S25, Galaxy S25 Plus និង Galaxy S25 Ultra ។ លើសពីនេះស្មាតហ្វូន Samsung Galaxy S25 គ្រប់ម៉ូឌែលទាំងអស់ទំនងជានឹងបំពាក់មកនូវឈីប Snapdragon eight Elite ព្រមទាំងភ្ជាប់មកជាមួយប្រព័ន្ធប្រតិបត្តិការ One UI 7 ផ្អែកលើ Android 15 ចេញពីប្រអប់ផងដែរ។
ទន្ទឹមនឹងនេះ ស្មាតហ្វូនខ្នាតកំពូល Samsung Galaxy S25 Ultra ត្រូវបានគេសន្មត់ថានឹងភ្ជាប់មកជាមួយ RAM ដល់ទៅ 16Gigabyte និងអង្គផ្ទុកទិន្នន័យរហូតដល់ 1Terabyte ព្រមទាំងនាំមកនូវការផ្លាស់ប្តូរការរចនាមួយចំនួន និងការកែលម្អកាមេរ៉ាមួយចំនួន ពោលគឺ Galaxy S25 Ultra អាចនឹងទទួលបានលេន ultrawide ថ្មី ទំហំ 50Megapixel និងលេន telephoto ទំហំ 50Megapixel ដែលគាំទ្រការថត 3x optical zoom ៕
