បើយោងតាមលោក Mark Gurman របស់ Bloomberg បាននិយាយថា ក្រុមហ៊ុន Apple នឹងធ្វើការប្រកាសដាក់បង្ហាញចេញ ជាផ្លូវការនូវទូរស័ព្ទដៃសេរ៊ីថ្មី iPhone SE 4 ឬ iPhone SE សេរ៊ីឆ្នាំ២០២៥ និង iPad 11 របស់ពួកគេ នៅក្នុងខែមេសា ខាងមុខនេះ ប៉ុន្តែ iPhone SE 4 នឹងផ្លាស់ប្តូរឈ្មោះទៅជា iPhone 16E វិញ ជាមួយតម្លៃលក់ចាប់ពី ៤៩៩ ដុល្លារ ពោលគឺមានតម្លៃថ្លៃជាង iPhone SE ដែលចេញលក់ក្នុងឆ្នាំ២០២២ ចំនួន ៧០ដុល្លារ ចំណែក iPad 11 វិញ នឹងមានតម្លៃលក់ចាប់ពី ៣៤៩ ដុល្លារ នៅក្នុងទីផ្សារសហរដ្ឋអាមេរិក ដូូចគ្នានឹង iPad 10 ។
ក្រៅពីនេះទៅទៀត ទូរស័ព្ទដៃ iPhone SE 4 ក៏អាចនឹងបំពាក់មកជាមួយមុខងារស្កេនមុខ FaceID, បាសសម្លេងចំនួន ២គ្រាប់ និងគាំទ្រការតភ្ជាប់ 5G, Wi-Fi 7, Bluetooth 5.3 និង NFC ផងដែរ។ រីឯផ្នែកថាមពលថ្ម iPhone SE 4 អាចនឹងគាំទ្រការសាកថ្មឥតខ្សែកម្លាំង 25W Magsafe charging របស់ iPhone 16 series ។
ចំពោះ iPad 11 ត្រូវបានរំពឹងថានឹងរក្សាអេក្រង់ទំហំ ១០,៩ អ៊ីញ ដដែល និងមានការរចនាដូច iPad Air ព្រមទាំងទទួលបានពណ៌ថ្មី ទទួលបានបន្ទះឈីប A18 ថ្មី ជាមួយនឹងប្រព័ន្ធប្រតិបត្តិការ iPadOS 18.3 សម្រាប់គាំទ្រសម្រាប់ Apple Intelligence និងទទួលបានម៉ូដឹម 5G ផ្ទាល់ខ្លួនផងដែរ៕