ក្រុមហ៊ុនផលិតរថយន្ត Honda បានធ្វើការដាក់បង្ហាញចេញជាផ្លូវការនូវគំរូរថយន្តអនាគតអគ្គិសនីសុទ្ធ Honda 0 Saloon ប្រភេទ Sedan ស្ថិតនៅក្នុង 0-series នៅឯពិព័រណ៍ CES 2025 ដែលកំពុងធ្វើឡើងនៅសហរដ្ឋអាមេរិក។
សម្រាប់ការរចនារូបរាង និងការឌីស្សាញផ្នែកខាងក្រៅរថយន្ត Honda 0 Saloon មានស្រដៀងគ្នាទៅនឹងរថយន្តរបស់ក្រុមហ៊ុន Lamborghini ពោលគឺរថយន្តនេះមានការរចនាបែបស្ព័រ លាយអនាគត ជាមួយរូបរាងទាប ជំនួយដល់ការការបើកបរក្នុងស្ថានភាពលឿន។ លើសពីនេះ រថយន្តនេះក៏មានភ្ជាប់មកជាមួយកញ្ចក់ចំហៀងបែបឌីជីថលផងដែរ ដែលអាចបង្ហាញទិដ្ឋភាពនៅកាន់អេក្រង់ខាងក្នុង ក៏ដូចជាចង្កៀងមុខ-ក្រោយ LED ឌីស្សាញបែបអនាគត ថាសកង់ស្ព័រឌីស្សាញថ្មី និងមិនមានទ្វារដៃនោះទេពោលគឺប្រើប្រាស់នូវ Key Card ។
គួរបញ្ជាក់ផងដែរថា រថយន្តអគ្គិសនី Honda 0 Saloon ត្រូវបានរាយការណ៏ថា អាចនឹងបើកបរបានចម្ងាយជិត ៥០០គីឡូម៉ែត្រ នៅពេលសាកថ្មពេញម្តង ហើយគ្រោងនឹងចេញលក់នៅអាមេរិកខាងជើងនៅដើមឆ្នាំ ២០២៦ ខាងមុខនេះ៕