[ទីផ្សារបរទេស] ក្រុមហ៊ុនផលិតរថយន្ត Mazda បានធ្វើការដាក់បង្ហាញចេញជាផ្លូវការនូវរថយន្ត Mazda MX-5 35th Anniversary Edition អបអរខួបលើកទី៣៥ របស់រថយន្តស្ព័រដ៏ល្បីឈ្មោះនេះ និងអបអរភាពល្បីល្បាញរបស់ MX-5 ដែលបានលក់ច្រើនជាង ១,២ លានគ្រឿងនៅលើសកលលោកចាប់តាំងពីឆ្នាំ ១៩៨៩ មក។
ក្នុងនោះ ម៉ូដែលនេះផលិតត្រឹមតែ ១ ០០០ គ្រឿងប៉ុណ្ណោះ ហើយនឹងដាក់លក់នៅប្រទេសជប៉ុនចាប់ពីខែកុម្ភៈ ដល់ថ្ងៃទី ០៣ ខែមីនា ឆ្នាំ២០២៥។
MX-5 35th Anniversary Edition មានជម្រើសចំនួន២ គឺ Soft Top និង RF (Retractable Fastback)។ សម្រាប់ Soft Top ដំណើរការដោយម៉ាស៊ីនសាំងចំណុះ ១,៥ លីត្រ ទំហំ ៤ស៊ីឡាំង ផលិតកម្លាំងបាន ១៣៤សេះ និងកម្លាំងរមួល ១៥២ញ៉ូតុនម៉ែត្រ ភ្ជាប់ដោយប្រអប់លេខដៃ ៦វគ្គ មានតម្លៃលក់ខ្ទង់ ២៣ ៨៧៧ ដុល្លារ នៅក្នុងប្រទេសជប៉ុន។ ចំណែក RF វិញ ប្រើម៉ាស៊ីន ២,០ លីត្រ ផលិតកម្លាំងបាន ១៨១សេះ និងកម្លាំងរមួល ២០៥ញ៉ូតុនម៉ែត្រ ភ្ជាប់ដោយជម្រើសប្រអប់លេខដៃ និងអូតូ ៦វគ្គ មានតម្លៃលក់ខ្ទង់ ២៧ ៧១៧ ដុល្លារ នៅក្នុងប្រទេសជប៉ុន។
សម្រាប់ការរចនាផ្នែកខាងក្រៅ ម៉ូដែលខួបនេះត្រូវបានរចនាឡើងជាមួយពណ៌ Artisan Red Premium Metallic ដែលផលិតដោយបច្ចេកទេសគូរគំនូរ Takuminuri និងបំពាក់ដោយថាសកង់អាលុយមីញ៉ូមទំហំ ១៧ អ៊ីញ មានឡូហ្គូលអក្សរ 35th Anniversary ។
ចំពោះផ្នែកខាងក្នុងវិញ ត្រូវបានរចនាផ្អែកលើ Roadster S Leather Package V Selection ដោយប្រើស្បែក Nappa និងបំពាក់ឡូហ្គូល Mazda MX-5 35th Anniversary Edition នៅលើក្បាលកៅអី និងកម្រាលជើងថ្មីមានឡូហ្គូល Mazda MX-5 35th Anniversary Edition ជាដើម៕
