យោងតាមរបាយការណ៍ពីប្រទេសកូរ៉េខាងត្បូងបានរាយការណ៍ថា ក្រុមហ៊ុន Apple អាចនឹងពន្យារពេលក្នុងការដាក់ឲប្រើប្រាស់នូវបន្ទះឈីបថ្មី 2nm នៅលើ iPhone 17 Pro ដែលត្រៀមចេញលក់នៅក្នុងឆ្នាំ២០២៥ នេះ ពោលគឺពួកគេនឹងពន្យាររហូតដល់ឆ្នាំ២០២៦។
ចំពោះការពន្យារពេលក្នុងការដាក់ឲប្រើបន្ទះឈីប 2nm រហូតដល់ឆ្នាំ២០២៦ នេះ ត្រូវបានអះអាងថាកើតឡើងដោយសារបញ្ហានៃការផលិត និងលទ្ធផលជោគជ័យរបស់ក្រុមហ៊ុន TSMC មានត្រឹមតែ ៦០ភាគរយ ប៉ុណ្ណោះនាពេលបច្ចុប្បន្ននេះ សម្រាប់ការផលិត និងការអភិវឌ្ឈន៍បន្ទះឈីប wafer 2nm ដែលបណ្តាលឱ្យពួកគេមានការខាតបង់សេដ្ឋកិច្ចជាច្រើនលានដុល្លារ ពោលគឺដោយសារបញ្ហាផលិតកម្ម និងការចំណាយខ្ពស់ប្រមាណ ៣០ ០០០ ដុល្លារ សម្រាប់ wafer ចំនួន១ និង ១២០លានដុល្លារ ក្នុងមួយខែ។
ជាមួយគ្នានេះ Apple អាចនឹងបន្តប្រើបន្ទះឈីប 3nm ក្នុង iPhone និង MacBooks របស់ពួកគេមួយឆ្នាំទៀត ដើម្បីអោយ TSMC មានពេលក្នុងការផលិត និងការអភិវឌ្ឈន៍បន្ទះឈីប wafer 2nm ថ្មីនេះគ្រប់គ្រាន់។
គួរឲដឹងថា ក្រុមហ៊ុន Samsung ក៏កំពុងប្រឈមនឹងបញ្ហានៅក្នុងដំណើរការបង្កើតបន្ទះឈីប 2nm ផងដែរ ខណៈក្រុមហ៊ុន Nvidia និង Qualcomm ក៏កំពុងពិភាក្សាដោយស្វែងរកជម្រើសផ្សេងទៀតក្នុងការផលិតបន្ទះឈីបផងដែរ៕