[ទីផ្សារចិន] ក្រុមហ៊ុនផលិតរថយន្តបណ្តាក់ទុនរួមគ្នា SIAC GM និង Wuling បានធ្វើការប្រកាសដាក់បង្ហាញចេញនូវរថយន្តអគ្គិសនីសុទ្ធ Wuling Sunshine EV ហើយគ្រោងនឹងដាក់ចេញលក់ជាផ្លូវការនៅដើមឆ្នាំ ២០២៥ ខាងមុខនេះ នៅក្នុងទីផ្សារប្រទេសចិន ជាមួយតម្លៃលក់ចាប់ពី ៦ ៩០០ ដុល្លារ។
Wuling Sunshine EV ដំណើរការដោយម៉ូទ័រអគ្គិសនីចំនួន ១ ប៉ុង ១ FWD អាចផលិតកម្លាំងបាន ៤០ សេះ ផ្គួបជាមួយជម្រើសអាគុយទំហំ ១៧,៦ និង ២៦,៥ គីឡូវ៉ាត់ម៉ោង និងមានល្បឿនអតិបរមា ១០០គ.ម/ម៉ោង ខណៈចម្ងាយបើកបរខាងក្រុមហ៊ុនមិនទាន់ដាក់បង្ហាញចេញនៅឡើយទេ។
រថយន្តនេះ មានប្រវែងតួខ្លួនសរុប ៣ ៦៨៥ ម.ម ទទឹង ១ ៥៣០ ម.ម កម្ពស់ ១ ៧៥០ ម.ម និងប្រវែងគម្លាតកង់មុខ-ក្រោយ ២ ៦០០ ម.ម ។ សម្រាប់រូបរាង និងការឌីស្សាញផ្នែកខាងក្រៅមានលក្ខណៈបែបជ្រុងស្រដៀងទៅនឹងម៉ូដែល Wulling Hongguang Mini EV ប្រើប្រាស់នូវទ្វារចំហៀងប្រភេទរូត ក៏ដូចជាចង្កៀងមុខ-ក្រោយ LED ជាដើម។
ចំពោះនៅផ្នែកខាងក្នុងវិញ អាចផ្ទុកទម្ងន់បាន ១ ១១៧ គីឡូក្រាម នៅពេលបត់អីទាំងអស់ចុះក្រោម លើសពីនេះ ក៏ទទួលបានគ្រឿងបន្ថែមផ្សេងៗដូចជា តុបត់ដែលមានមុខងារច្រើនមុខ កន្លែងដាក់ដបទឹក និងកន្លែងដាក់ទូរសព្ទដៃផងដែរ៕
