ក្រុមហ៊ុនផលិតទូរស័ព្ទដៃ OnePlus បានប្រកាសដាក់បង្ហាញចេញជាផ្លូវការទូរស័ព្ទដៃសេរ៊ីថ្មី OnePlus Ace 5 និង Ace 5 Pro ជាមួយតម្លៃលក់ចាប់ពី ៣១៥ ដុល្លារ ដល់ ៤៧៩ ដុល្លារ សម្រាប់ Ace 5 និងចាប់ពី ៤៦៥ ដុល្លារ ដល់ ៦៤៣ ដុល្លារ សម្រាប់ Ace 5 Pro នៅក្នុងទីផ្សារប្រទេសចិន។
ទូរស័ព្ទដៃ OnePlus Ace 5 និង Ace 5 Pro ទទួលបានអេក្រង់ 8T LTPO AMOLED ទំហំ ៦,៧៨ អ៊ីញ 120Hz មានកម្រិតបង្ហាញ 1.5K (2780×1264 pixels) និងកម្រិតពន្លឺ 4,500 nits ដំណើរការដោយបន្ទះឈីប Snapdragon 8 Gen 3 ទំហំ 4nm និងបន្ទះឈីប Snapdragon 8 Elite ទំហំ 3nm (Pro) ជាមួយនឹងប្រព័ន្ធប្រតិបត្តិការ Android 15 នៅលើ ColorOS 15 និងទទួលបាន RAM 12GB / 16GB និងអង្គផ្ទុក 256GB / 512GB / 1TB ប្រភេទ UFS 4.0 ព្រមទាំងអាចប្រើប្រាស់សុីមបានចំនួន២ និងអាចស្កេនម្រាមដៃនៅលើអេក្រង់បាន។
សម្រាប់ផ្នែកកាមេរ៉ាទូរស័ព្ទដៃ OnePlus Ace 5 និង Ace 5 Pro ទទួលបានកាម៉េរ៉ាគោលខាងក្រោយទំហំ 50MP ប្រើប្រាស់សេនស័រ Sony IMX906 មាន aperture f/1.8 និង OIS បូករួមជាមួយលេនទូលាយ Ultra-Wide ទំហំ 8MP ប្រើប្រាស់សេនស័រ Sony IMX355 មាន aperture f/2.2 អាចថតបានមុំ ១២០ដឺក្រេ និងលេន macro ទំហំ 2MP ប្រើប្រាស់សេនស័រ OmniVision OV02B មាន aperture f/2.0 និងភ្លើង LED flash អាចថតវិដេអូបានកម្រិត 4K ក្នុងល្បឿន 60 fps ។ ចំណែកកាមេរ៉ាផ្នែកខាងមុខរបស់ទូរស័ព្ទដៃទាំង ២ម៉ូឌែលនេះ មានទំហំ 16MP ប្រើប្រាស់សេនស័រ Sony IMX480 មាន aperture f/2.4 អាចថតវិដេអូបានកម្រិត 1080p ក្នុងល្បឿន 30 fps ។
ចំណែកផ្នែកថាមពលថ្ម OnePlus Ace 5 និង Ace 5 Pro ទទួលបានកញ្ជប់ថាមពលថ្មទំហំ 6,415mAh និង 6,100mAh (Pro) គាំទ្រការសាកល្បឿនលឿនតាមខ្សែកម្លាំង 80W និង 100W (Pro) អាចសាកបាន ១០០ភាគរយ ចំណាយពេលខ្ទង់ ៣៦នាទី ប៉ុណ្ណោះ។ លើសពីនេះទៅទៀត ទូរស័ព្ទដៃទាំង ២ម៉ូឌែលនេះ គឺមានបំពាក់មកជាមួយអាវការពារធូលី និងទឹកកម្រិត IP65 និងគាំទ្រការតភ្ជាប់ 5G, 4G VoLTE, Wi-Fi 7, Bluetooth 5.4, GPS, USB Type-C, NFC និងទទួលបានរន្ធ USB Type-C audio និងបាសសម្លេង Stereo speakers ។
ពាណិជ្ជកម្ម
គួរឲដឹងថា ការរចនារបស់ស្មាតហ្វូន OnePlus Ace 5 និង Ace 5 Pro មានកម្រាស់ខ្ទង់ ៨ ម.ម និងទម្ងន់ខ្ទង់ ២០០ ក្រាម និងទទួលបានជម្រើសពណ៌ខ្មៅ បៃតង និងប្រាក់ សម្រាប់ Ace 5 និងពណ៌ខ្មៅ ស និងស្វាយ សម្រាប់ Ace 5 Pro ៕