[ទីផ្សារបរទេស] ក្រុមហ៊ុនផលិតរថយន្ត Honda បានធ្វើការដាក់បង្ហាញចេញជាផ្លូវការនូវរថយន្ត Honda Amade ជំនាន់ទី ៣ ស៊េរីឆ្នាំ ២០២៥ នៅក្នុងទីផ្សារប្រទេសឥណ្ឌា ជាមួយតម្លៃលក់ចាប់ពី ៩ ៤០០ ដុល្លារ ដល់ ១២ ៩០០ ដុល្លារ ។
Honda Amade ជំនាន់ថ្មីនេះ មានប្រវែងតួខ្លួនសរុប ៣ ៩៩៥ ម.ម ទទឹង ១ ៧៣៣ ម.ម កម្ពស់ ១ ៥០០ ម.ម និងប្រវែងគម្លាតកង់មុខ-ក្រោយ ២ ៤៧០ ម.ម ដំណើរការដោយម៉ាស៊ីនសាំងប្រភេទ i-VTEC មានចំណុះ ១,២ លីត្រ ទំហំ ៤ស៊ីឡាំង អាចផលិតកម្លាំងបាន ៨៩ សេះ និងកម្លាំងរមួល ១១០ ញ៉ូតុនម៉ែត្រ ភ្ជាប់ដោយជម្រើសប្រអប់លេខដៃចំនួន ៥វគ្គ និង CVT ជាមួយកម្រិតស៊ីប្រេងខ្ទង់ ៥លីត្រ ក្នុងចម្ងាយបើកបរ ១០០ គីឡូម៉ែត្រ។
សម្រាប់ការឌីស្សាញផ្នែកខាងក្រៅត្រូវបានផ្លាស់ប្តូរថ្មីទាំងស្រុងមានភាពអំណាចជាងមុនដោយមានប៉ាណាទំហំធំជាងជំនាន់មុនអបជាមួយចង្កៀងមុខ-ក្រោយ LED ថ្មីរាងស្លីម ព្រមទាំងប្រើប្រាស់នូវថាសកង់ស្ព័រថ្មីទំហំ ១៥អ៊ីញ និងដៃទ្វារប្រភេទ Flush-door រួមជាមួយនឹងទ្វាឃ្លុបក្រោយបើក-បិទដោយថាមពលអគ្គិសនី។
ចំពោះនៅផ្នែកខាងក្នុងវិញ ទទួលបានអេក្រង់កុងទ័របង្ហាញព័ត៌មានឌីជីថលទំហំ ៧អ៊ីញ និងអេក្រង់កំសាន្ត touchscreen ទំហំ ៨អ៊ីញ អាចភ្ជាប់មុខងារ Apple CarPlay និង Android Auto ក៏ដូចជាកន្លែងសាកថ្មឥតប្រើខ្សែ និងប្រព័ន្ធជំនួយការអ្នកបើកបរ Honda Sensing ADAS technology ជាស្តង់ដារ រួមទាំងប្រព័ន្ធបើកបរដោយស្វ័យប្រវិត្តិកម្រិតទី ២ និងពោងសុវត្ថិភាពចំនួន ៦ចំនុចផងដែរ៕