តម្លៃភាគហ៊ុនរបស់ក្រុមហ៊ុន Tesla បានធ្លាក់ចុះ ៨,៦% កាលពីថ្ងៃច័ន្ទកន្លងទៅនេះ ហើយតម្លៃខ្លួនរបស់ក្រុមហ៊ុននេះក៏បានធ្លាក់ចុះ យ៉ាងហោចណាស់ ១៥ ភាគរយនៅសប្តាហ៍នេះផងដែរ។
ការធ្លាក់ចុះដែលក្រុមអ្នកវិភាគរាយការណ៍ថា យ៉ាងហោចណាស់មានមួយផ្នែកពាក់ព័ន្ធទៅលើសកម្មភាពរបស់នាយកប្រតិបត្តិ លោក Elon Musk បានមើលឃើញថា ទ្រព្យសម្បត្តិផ្ទាល់ខ្លួនរបស់លោក ធ្លាក់ចុះប្រមាណ ១៥ ពាន់លានដុល្លារ។
ការធ្លាក់ចុះតម្លៃភាគហ៊ុនកាលពីថ្ងៃច័ន្ទនោះ គឺជាការធ្លាក់ចុះខ្លាំងបំផុតក្នុងរយៈពេលមួយថ្ងៃ បើគិតចាប់តាំងពីខែកញ្ញាមក ហើយវាកើតឡើងបន្ទាប់ពីការ Comment របស់លោក Musk លើបណ្តាញសង្គម Twitter ថា “តម្លៃនៃរូបិយប័ណ្ណឌីជីថល ហាក់ដូចជាខ្ពស់ណាស់”។
ជាមួយគ្នានេះដែរ វាក៏ជារឿងមួយដែលធ្វើឲ្យវិនិយោគិនព្រួយបារម្ភផងដែរ បន្ទាប់ពីក្រុមហ៊ុន Tesla បានប្រកាសជាសាធារណៈថា ខ្លួនកំពុងវិនិយោគទឹកប្រាក់ចំនួន ១,៥ ពាន់លានដុល្លារលើរូបិយប័ណ្ណឌីជីថល Bitcoin៕