កាលពីពេលថ្មីៗនេះ ក្រុមហ៊ុន Google បានប្រកាសថា ពួកគេអាចនឹងដាក់បង្ហាញចេញនូវប្រព័ន្ធប្រតិបត្តិការ Android 16 នៅក្នុងខែមិថុនា ឆមាសទី២ ឆ្នាំ២០២៥ ខាងមុខនេះ បន្ទាប់ពីដាក់ឱ្យដំណើរការ Android 15 កាលពីពេលថ្មីៗនេះផងដែរ។
គួរបញ្ជាក់ផងដែរថា ការដែលដាក់បង្ហាញចេញនូវប្រព័ន្ធប្រតិបត្តិការ Android 16 ថ្មីនេះ អាចនឹងមានការផ្លាស់ប្តូរពេលវេលាទៅតាមភាពជាក់ស្តែង ដោយក្រុមហ៊ុនគ្រោងនឹងដាក់បង្ហាញចេញនូវកំណែអាប់ឌែតប្រព័ន្ធប្រតិបត្តិការ Android 16 ថ្មីមួយទៀតនៅក្នុងឆមាសទី៤ ឆ្នាំ២០២៥ ជាមួយនឹង API (Application Programming Interface) ថ្មីៗមួយចំនួនបន្ថែមទៀតផងដែរ។
លើសពីនេះទៅទៀត ស្មាតហ្វូនសេរ៊ីថ្មី Pixel 10 របស់ក្រុមហ៊ុន Google អាចនឹងទទួលបានប្រព័ន្ធប្រតិបត្តិការ Android 16 ថ្មីនេះ នៅក្នុងខែសីហា ឬចុងឆ្នាំ២០២៥។
ចំពោះ ការចេញផ្សាយ Android 16 Preview សម្រាប់អ្នកអភិវឌ្ឍន៍ នឹងត្រូវធ្វើឡើងនៅដើមខែធ្នូ ឆ្នាំ២០២៤ ខាងមុខនេះ ដើម្បីសាកល្បង និងរៀបចំ សម្រាប់ប្រព័ន្ធប្រតិបត្តិការ Android ថ្មីនេះ។
ទន្ទឹមនឹងនេះ ប្រព័ន្ធប្រតិបត្តិការ Android 16 ថ្មីនេះ នឹងផ្តោតទៅលើការច្នៃប្រឌិតថ្មីៗសម្រាប់ apps និង devices និងមានលក្ខណៈ និងមុខងារថ្មីៗជាច្រើនដែលផ្តោតទៅលើការបង្កើនសុវត្ថិភាព និងការអភិវឌ្ឍប្រព័ន្ធអេកូឡូស៊ីរបស់ Android ៕