យោងតាមលោក Daniel Ives អ្នកវិភាគនៅក្រុមហ៊ុន Wedbush Securities បាននិយាយថា ក្រុមហ៊ុន Tesla បានរកប្រាក់ចំណេញជាលុយប្រមាណ ១ ពាន់លានដុល្លារ ពីការវិនិយោគរបស់គេទៅជា Bitcoin។
Ives បានប៉ាន់ស្មាននៅក្នុងកំណត់ត្រាមួយ ដែលត្រូវបានចេញផ្សាយកាលពីថ្ងៃសៅរ៍ថា “ក្រុមហ៊ុន Tesla កំពុងស្ថិតនៅលើគន្លងមួយ ដែលការវិនិយោគលើ Bitcoin អាចរកប្រាក់ចំណេញបានច្រើនជាងប្រាក់ចំណេញពីការលក់រថយន្តអគ្គិសនីរបស់គេ នៅក្នុងឆ្នាំ ២០២០ ទៅទៀត”។
គួររំលឹកឲ្យដឹងដែរថា ក្រុមហ៊ុន Tesla ទើបតែបានទិញយកភាគហ៊ុន Bitcoin សរុបចំនួន ១,៥ ពាន់លានដុល្លារ។ ក្រុមហ៊ុនផលិតរថយន្តអគ្គិសនីអាមេរិកខាងលើ បាននិយាយថា ខ្លួនបានទិញ Bitcoin សម្រាប់ “ភាពបត់បែនបន្ថែមទៀតដើម្បីធ្វើពិពិធកម្ម និងពង្រីកប្រាក់ចំណេញរបស់ខ្លួនឲ្យបានច្រើនបំផុត”។
បន្ថែមពីលើការទិញនេះ ក្រុមហ៊ុន Tesla បាននិយាយថា ខ្លួននឹងចាប់ផ្តើមទទួលយកការទូទាត់ជា Bitcoin សម្រាប់ផលិតផលរបស់ខ្លួនផងដែរ។ ការធ្វើបែបនេះ នឹងធ្វើឲ្យ Tesla ក្លាយជាក្រុមហ៊ុនផលិតរថយន្តធំដំបូងគេ ដែលទទួលយក Bitcoin ជាការទូទាត់។
សូមបញ្ជាក់ថា Bitcoin បានបង្កើតកំណត់ត្រាថ្មីមួយ កាលពីថ្ងៃសុក្រសប្តាហ៍មុន និងកើនតម្លៃខ្លួនសរុប ១ សែនកោដិដុល្លារ (trillion) សម្រាប់មូលធននីយកម្មទីផ្សារ។ រូបិយប័ណ្ណឌីជីថល Bitcoin បានបង្កើតកំណត់ត្រាថ្មីមួយទៀត ដែលមានតម្លៃប្រហែល ៥៦ ០០០ ដុល្លារក្នុងមួយកាក់ មានន័យថា តម្លៃរួមបញ្ចូលគ្នានៃ Bitcoin ទាំងអស់ឥឡូវនេះមានចំនួនលើសមួយសែនកោដិដុល្លារហើយ។ នេះបើយោងតាមអ្នកផ្តល់ទិន្នន័យ Coinmarketcap.com៕