យោងតាមប្រភពព័ត៌មានបានឲ្យដឹងថា ក្រុមហ៊ុន Toyota នឹងវិនិយោគទឹកប្រាក់ចំនួន ២១០ លានដុល្លារ ដើម្បីធ្វើឲ្យប្រសើរឡើងនូវផលិតកម្មម៉ាស៊ីនដែលមានស្រាប់របស់ខ្លួន នៅរោងចក្រក្នុងទីក្រុង Buffalo រដ្ឋ West Virginia សហរដ្ឋអាមេរិក។
ក្រុមហ៊ុនផលិតរថយន្តជប៉ុនខាងលើបានប្រកាសថា ការវិនិយោគនេះនឹងត្រូវបានប្រើដើម្បីធ្វើឲ្យប្រសើរឡើង នូវខ្សែសង្វាក់ផលិតកម្មម៉ាស៊ីន ៦ ស៊ីឡាំងនាពេលបច្ចុប្បន្នរបស់រោងចក្រុង Toyota Motor Manufacturing West Virginia ជាមួយនឹងឧបករណ៍ និងគ្រឿងម៉ាស៊ីនថ្មី ដែលផ្តល់ឲ្យរោងចក្រខាងលើមានភាពបត់បែនបន្ថែមទៀត ក្នុងការផលិតម៉ាស៊ីនដោយផ្អែកលើតម្រូវការទីផ្សារ និងបន្ថែមការងារថ្មី ១០០ ដើម្បីបង្កើនសមត្ថភាពដំឡើងរបស់ម៉ាស៊ីន ៤ ស៊ីឡាំង ផងដែរ។
ក្នុងនោះផងដែរ ការវិនិយោគនេះក៏នឹងបង្កើតម៉ោងធ្វើការទី ៣ នៅរោងចក្រខាងលើ ដោយបង្កើនចំនួនម៉ាស៊ីនដែលត្រូវផលិតចំនួន ៧ ម៉ឺនគ្រឿងក្នុងមួយឆ្នាំ។
គួរឲ្យដឹងថា ជាមួយនឹងការវិនិយោគចុងក្រោយនេះ Toyota នឹងវិនិយោគជាង ១,៨ ពាន់លានដុល្លារទៅក្នុងរោងចក្រខាងលើ និងផ្តល់ការងារដល់មនុស្សជាង ២ ០០០ នាក់នៅទីនោះទៀតផង។
មិនតែប៉ុណ្ណោះ រោងចក្រ Toyota Motor Manufacturing West Virginia កំពុងតែប្រារព្ធខួបលើកទី ២៥ របស់ខ្លួននៅឆ្នាំនេះ និងផលិតម៉ាស៊ីន និងប្រអប់លេខជិត ១ លានគ្រឿងក្នុងមួយឆ្នាំ សម្រាប់រថយន្ត Toyota រួមមានដូចជាម៉ូដែល Avalon, Camry, Corolla, Highlander, Highlander Hybrid, RAV4, Sienna និង Sienna Hybrid ក៏ដូចជារថយន្ត Lexus ES និង RX350 ផងដែរ៕