នាពេលថ្មីៗនេះ ក្រុមហ៊ុន HUAWEI បានធ្វើការប្រកាសដាក់បង្ហាញចេញជាផ្លូវការនូវថេបប្លេតសេរ៊ីថ្មី HUAWEI MatePad Pro ជាមួយតម្លៃលក់ចាប់ពី ៩៤៨ ដុល្លារ ដល់ ១ ១១៥ ដុល្លារ ក្នុងទីផ្សារតំបន់អឺរ៉ុប។
ថេបប្លេត HUAWEI MatePad Pro បំពាក់ដោយបន្ទះអេក្រង់ OLED ទំហំ ១២,២ អ៊ីញ 144Hz មានកម្រិតពន្លឺ 2000 nits និងកម្រិតបង្ហាញ 2800 × 1840 pixels ដំណើរការដោយបន្ទះឈីប Kirin T91 និងប្រព័ន្ធប្រតិបត្តិការនៅលើ HarmonyOS 4.2 ព្រមទាំងទទួលបាន RAM 12GB និងអង្គផ្ទុក 256GB | 512GB។ លើសពីនេះទៅទៀត MatePad Pro ក៏មានភ្ជាប់មកជាមួយ HUAWEI Glide Keyboard ដែលមានមុខងារ 2-in-1 stylus ដែលអាចសាកថ្មនៅលើក្តារចុចបាន។
សម្រាប់ថេបប្លេតនេះ ទទួលបានថាមពលថ្ម ១០ ១០០ មីលីអំពែរ គាំទ្រការសាកថ្មល្បឿនលឿន ១០០ វ៉ាត់ Turbo សាកឡើងពី ០ ដល់ ១០០ភាគរយ ចំណាយពេល ៥៥ នាទី ប៉ុណ្ណោះ។ ចំពោះផ្នែកកាម៉េរ៉ាវិញ មានបំពាក់ដោយសេនស័រកាមេរ៉ាខាងមុខមានទំហំ 8MP និងលេនគោលខាងក្រោយទំហំ 13MP បូករួមទាំងលេនថតមុំទូលាយ Ultra-wide ទំហំ 8MP អាចថតវីដេអូបានកម្រិត 4K 30fps ។
គួរបញ្ជាក់ថា MatePad Pro 12.2 ទទួលបានពណ៌តួខ្លួនគោលចំនួន ២ រួមមាន ពណ៌ Premium Gold និងពណ៌ខ្មៅ ជាមួយទម្ងន់ ៥០៨ ក្រាម និងកម្រាស់ ៥,៥ មីលីម៉ែត្រ បំពាក់ជាមួយរន្ធសម្លេង និងរន្ធ microphone ចំនួន៤ និងគាំទ្រការតភ្ជាប់មុខងារ Wi-Fi | Bluetooth 5.2 | USB 3.1 Gen 1 | GPS ក៏ដូចជាមុខងារស្កេនម្រាមដៃ និងមុខងារ AI មួយចំនួនផងដែរ៕