[ទីផ្សារបរទេស] កាលពីពេលថ្មីៗនេះ ក្រុមហ៊ុនផលិតរថយន្ត MG Motor India បានធ្វើការប្រកាសដាក់បង្ហាញបញ្ចេញជាផ្លូវការនូវរថយន្តអគ្គិសនី MG Windsor ប្រភេទ MPV ដែលមានតម្លៃលក់ចាប់ពី ១២ ០០០ ដុល្លារ ក្នុងទីផ្សារប្រទេសឥណ្ឌា។
ពាណិជ្ជកម្ម
រថយន្តអគ្គិសនី MG Windsor ដំណើរការដោយម៉ូទ័រអគ្គិសនីចំនួន ១ ប៉ុង ១ វិលកង់មុខ ផលិតកម្លាំងបាន ១៣៦ សេះ និងកម្លាំងរមួល ២០០ ញ៉ូតុនម៉ែត្រ ផ្គួបជាមួយជម្រើសអាគុយទំហំ ៣៨ គីឡូវ៉ាត់ម៉ោង អាចបើកបរបានចម្ងាយខ្ទង់ពី ៣៣១ គីឡូម៉ែត្រនៅពេលសាកថ្មពេញម្តង និងគាំទ្រការសាកថ្មល្បឿនលឿនអាចសាកឡើងដល់ ៨០ ភាគរយ ចំណាយពេល ៤០នាទីប៉ុណ្ណោះ។
ចំពោះការឌីស្សាញផ្នែកខាងក្រៅមានភាពទាន់សម័យ បំពាក់ដោយប៉ាណាមុខបិទជិត ចង្កៀងមុខ-ក្រោយរចនាថ្មីប្លែកប្រភេទ LED កាងរន្ធខ្យល់ទំហំធំល្មម ព្រមទាំងប្រើប្រាស់ថាសកង់ស្ព័រទំហំ ១៧ និង ១៨អ៊ីញ និងដៃទ្វារប្រភេទអគ្គិសនី។
ខណៈនៅផ្នែកខាងក្នុងវិញ មានភ្ជាប់មកជាមួយកុងទ័របង្ហាញព័ត៌មានឌីជីថលទំហំ ៨,៨ អ៊ីញ និងអេក្រង់កំសាន្ត touchscreen ទំហំ ១៥,៦ អ៊ីញ ក៏ដូចជាកន្លែងសាកថ្មឥតខ្សែ អំពូល ambient lighting ដំបូលកញ្ជក់ panoramic sunroof រន្ធសម្លេងចំនួន ៩ចំនុច រួមជាមួយមុខងារទម្លាក់ទម្លើងកៅអីមុខ-ក្រោយ។ លើសពីនេះ ក៏បានបំពាក់ប្រព័ន្ធជំនួយការអ្នកបើកបរជាច្រើនដូចជា ពោងសុវត្ថិភាពចំនួន ៦ចំនុច មុខងារគ្រប់គ្រងលំនឹងឡាន មុខងារត្រួតពិនិត្យសម្ពាធសំបកកង់ ហ្វ្រាំងអូតូ និងកាមេរ៉ា ៣៦០ ជាដើម៕