[ទីផ្សារបរទេស] កាលពីពេលថ្មីៗនេះ ក្រុមហ៊ុនផលិតរថយន្ត Hyundai Motor បានធ្វើការដាក់បង្ហាញចេញជាផ្លូវការនូវរថយន្ត Hyundai Santa Fe ស៊េរីឆ្នាំ២០២៥ អាប់ឌែតថ្មី ជំនាន់ទី៥ ជាមួយតម្លៃលក់ចាប់ពី ២៦ ០០០ដុល្លារ ដល់ ៣៣ ៥០០ដុល្លារ នៅក្នុងទីផ្សារប្រទេសកូរ៉េខាងត្បូង។
សម្រាប់រថយន្តនេះ មានប្រវែងតួខ្លូនសរុប ៤ ៨៣០ ម.ម ទទឹង ១ ៩០០ ម.ម កំពស់ ១ ៧៨០ ម.ម និងប្រវែងគន្លាតកង់មុខ-ក្រោយ ២ ៨១៥ ម.ម មានការរចនានៅផ្នែកខាងក្រៅបែបប្រអប់ជ្រុង បានប្រើប្រាស់ចង្កៀងមុខ-ក្រោយរាងអក្សរ H និងថាសកង់ស្ព័រទំហំ ២០អ៊ីញ រួមជាមួយដំបូល Panoramic Sunroof។
ទាក់ទងនឹងផ្នែកម៉ាសុីន Hyundai Santa Fe ស៊េរីឆ្នាំ២០២៥ អាប់ឌែតថ្មី ដំណើរការដោយម៉ាសុីនកូនកាត់ Hybrid ធ្វើការរួមគ្នារវាងម៉ាសុីនសុាំងចំណុះ ១,៦លីត្រ ជំនួយដោយ Turbocharged ទំហំ ៤សុីឡាំង ផ្គួបជាមួយម៉ូទ័រអគ្គិសនីចំនួន ១ អាចផលិតកម្លាំងសរុបបាន ២២៦ សេះ និងកម្លាំងរមួល ៣៥០ ញ៉ូតុនម៉ែត្រ ភ្ជាប់ដោយប្រអប់លេខអូតូ ៦វគ្គ ប្រព័ន្ធបើកបរប៉ុង១ 2WD និងមានកម្រិតសុីប្រេង ១លីត្រ ក្នុងចម្ងាយ ១៤,៤គីឡូម៉ែត្រ(ទីក្រុង)។
ចំពោះនៅផ្នែកខាងក្នុងវិញ Hyundai Santa Fe ស៊េរីឆ្នាំ២០២៥ អាប់ឌែតថ្មី មានទំហំធំទូលាយជាងរថយន្តជំនាន់មុននឹងត្រូវបានបំពាក់ដោយកុងទ័របង្ហាញព័ត៌មានឌីជីថលទំហំ ១២,៣ អ៊ីញ និងអេក្រង់កំសាន្ត touchscreen ទំហំ ១២,៣ អ៊ីញ ជាប្រភេទអេក្រង់ភ្លោះ អេក្រង់ Head-Up Display កន្លែងសាកថ្មឥតប្រើខ្សែចំនួន ២ចំនុច និងបំពាក់ជាមួយមុខងារ ADAS ថ្មីដូចជា Front Collision Prevention Assistance, Highway Driving Assist 2, Rear Collision Prevention Assistance, Navigation-Based Smart Cruise Control, Surround View Monitor, Rear Side Monitor & Side Parking Distance Warning និង Remote Smart Parking Assistance៕