[ទីផ្សារចិន] ថ្មីៗនេះ ក្រុមហ៊ុនផលិតរថយន្ត Wuling បានធ្វើការដាក់បង្ហាញចេញលក់ជាផ្លូវការនូវរថយន្តអគ្គិសនី Wuling Hongguang Mini Youth Edition ជាមួយតម្លៃលក់ចាប់ពី ៥ ៧០០ ដុល្លារ ក្នុងទីផ្សារប្រទេសចិន។
រថយន្តអគ្គិសនី Wuling Hongguang Mini មានប្រវែងតួខ្លួនសរុប ៣ ០៦៤ ម.ម ទទឹង ១ ៤៩៣ ម.ម កម្ពស់ ១ ៦១៤ ម.ម និងប្រវែងគម្លាតកង់មុខ-ក្រោយ ២ ០១០ ម.ម ដំណើរការដោយម៉ូទ័រអគ្គិសនីចំនួន ១ ផលិតកម្លាំងបាន ៣០ គីឡូវ៉ាត់ និងកម្លាំងរមួល ៩២ ញ៉ូតុនម៉ែត្រ ផ្គួបជាមួយអាគុយទំហំ ១៧,៣ គីឡូវ៉ាត់ម៉ោង អាចបើកបរបានចម្ងាយ ២១៥ គីឡូម៉ែត្រ នៅពេលសាកថ្មពេញម្តង គាំទ្រដោយឆ្នាំងសាកថ្មល្បឿន អាចសាកឡើងពី ៣០ ទៅ ៨០ ភាគរយ ចំណាយពេលខ្ទង់ ៣៥ នាទី។
សម្រាប់ការរចនាផ្នែកខាងក្រៅ មានការរចនាជាមួយប៉ាណាបិទជិតដោយបានភ្ជាប់មកជាមួយចង្កៀងមុខ-ក្រោយជាប្រភេទ LED ដ៏ស្លីមរាងមូល រួមជាមួយថាសកង់ទំហំមធ្យម និងជម្រើសពណ៌តួខ្លួនចំនួន ៥ រួមមាន milk apricot coffee, light mango yellow, avocado green, white peach pink និង iris blue។
ចំពោះផ្នែកខាងក្នុង ទទួលបានអេក្រង់ឌីជីថលចំនួន១ រន្ធម៉ាសុីត្រជាក់ រន្ធ USB និងប្រព័ន្ធសុវត្ថិភាពនិងប្រព័ន្ធជំនួយការបើកបរមួយចំនួនទៀតរួមមាន ប្រព័ន្ធហ្វ្រាំងអូតូ ពោងសុវត្ថិភាពចំនួន ២ចំនុច និងប្រព័ន្ធចាប់សញ្ញាជាដើម៕