ក្រុមហ៊ុនចិនមួយ រំពឹងផលិតវ៉ាក់សាំងកូវីដ១៩ បាន ៤០០លានដូសក្នុងមួយឆ្នាំ

ក្រុមហ៊ុនផលិត ផលិតផលជីវសាស្រ្តចិន BioKangtai បាននិយាយកាលពីថ្ងៃអង្គារ ទី២ ខែកុម្ភៈ ថាខ្លួនបានបញ្ចប់នូវទីតាំងដែលបានរៀបចំឡើង ដើម្បីអាចផលិតវ៉ាក់សាំងកូវីដ១៩ របស់ក្រុមហ៊ុន AstraZeneca ចំនួន ៤០០ លានដូសក្នុងមួយឆ្នាំ ដែលកើនឡើងទ្វេដងនៃគោលដៅដែលបានសន្យា កាលឆ្នាំ ២០២០។

ពាណិជ្ជកម្ម

ក្រុមហ៊ុនដែលមានមូលដ្ឋាននៅទីក្រុង Shenzhen នេះ បាននិយាយនៅក្នុងសេចក្តីប្រកាសព័ត៌មានមួយថា “Kangtai កំពុងជំរុញនីតិវិធីយ៉ាងសកម្មសម្រាប់ការសាកល្បង និងចុះបញ្ជីគ្លីនិកវ៉ាក់សាំងនៅក្នុងប្រទេសចិន ហើយបានរៀបចំរួចរាល់នូវរោងចក្រផលិត និងចាប់ផ្តើមផលិតសាកល្បងផងដែរ”។

គួរឲ្យដឹងថា ក្រុមហ៊ុននេះទទួលបានសិទ្ធិក្នុងការផ្គត់ផ្គង់វ៉ាក់សាំង AZD1222 ដែលត្រូវបានបង្កើតឡើងដោយក្រុមហ៊ុនផលិតឱសថស៊ុយអ៊ែត Anglo-Swedish និងសាកលវិទ្យាល័យ Oxford University។

លោក Leon Wang ប្រធានផ្នែកប្រតិបត្តិការរបស់ក្រុមហ៊ុន AstraZeneca នៅប្រទេសចិន បាននិយាយកាលពីខែវិច្ឆិកាថា វ៉ាក់សាំងនេះអាចត្រូវបានអនុញ្ញាតិឲ្យប្រើប្រាស់ក្នុងប្រទេសចិន នៅពាក់កណ្តាលឆ្នាំ ២០២១ បន្ទាប់ពីប្រមូលទិន្នន័យសុវត្ថិភាពពីការសាកល្បង ដំណាក់កាលទី ១ និង ទី ២ នៅក្នុងប្រទេសចិន និងទិន្នន័យប្រសិទ្ធភាពពីការសាកល្បងដំណាក់កាលចុងក្រោយនៅឯបរទេស៕