នាពេលបច្ចុប្បន្ននេះមានប្រទេសតែពីរប៉ុណ្ណោះនៅក្នុងតំបន់អាស៊ាន ដែលមានវត្តមានហាងលក់ទំនិញផ្លូវការរបស់ Apple។ ឆាប់ៗខាងមុខនេះ នឹងមានប្រទេសមួយទៀតចូលរួមជាមួយប្រទេសសិង្ហបុរី និងប្រទេសថៃ នោះគឺប្រទេសម៉ាឡេស៊ី។
បើតាមការប្រកាសនៅលើវិបសាយ ហាង Apple Store ក្នុងប្រទេសម៉ាឡេស៊ី នឹងតាំងទីនៅតំបន់ផ្សារទំនើប The Exchange TRX ក្នុងទីក្រុងកូឡាឡាំពួរ ហើយនឹងបើកដំណើរការនៅថ្ងៃទី២២ ខែមិថុនា។
នៅតំបន់អាស៊ីអាគ្នេយ៍នាពេលបច្ចុប្បន្ន សិង្ហបុរីមានហាង Apple Store ចំនួនបី ខណៈនៅប្រទេសថៃ មានចំនួនពីរហាង។ ប្រភពពីសារព័ត៌មានក្នុងស្រុកបានលើកឡើងថា ហាង Apple នៅម៉ាឡេស៊ី បានចាប់ផ្ដើមផលិតកាលពីឆ្នាំមុន ប៉ុន្តែត្រូវបានលាក់បាំងយ៉ាងប្រុងប្រយ័ត្ន។
តាមការចុះផ្សាយរបស់ Bloomberg ឲ្យដឹងថា Apple មានផែនការបើកដំណើរការហាងលក់នៅតំបន់អាស៊ីប៉ាស៊ីហ្វិកបន្ថែមចំនួន១៥ទីតាំង នៅត្រឹមឆ្នាំ២០២៧ខាងមុខ។
ក្រុមហ៊ុន Apple នាពេលបច្ចុប្បន្នមានហាងលក់លើសពី ៥២០កន្លែង នៅក្នុងប្រទេសចំនួន២៦ ដោយផ្ដោតសំខាន់លើការផ្សព្វផ្សាយពីម៉ាកសញ្ញា ជាជាងការលក់ ហើយវាក៏ជាទីតាំងសម្រាប់អតិថិជនទទួលយកបទពិសោធន៍ផលិតផលថ្មី ក្រោយពីការប្រកាសចេញ ដើម្បីបម្រើសេវាកម្មបច្ចេកទេស និងបង្កើតថ្នាក់បង្រៀនជាដើម។
ប្រាក់ចំណូលរបស់ Apple មួយភាគធំ គឺបានមកពីវិបសាយលក់អនឡាញ និងតាមរយៈដៃគូចែកចាយផ្លូវការ៕