ក្រុមហ៊ុន Samsung Display និង LG Display ទទួលបានការអនុញ្ញាតក្នុងការផលិតអេក្រង់ OLED សម្រាប់ប្រើលើ iPhone 16 Pro របស់ Apple ដែលគ្រោងប្រកាសចេញនៅអំឡុងខែកញ្ញា។ នេះបើតាមការចុះផ្សាយរបស់ The Elec។
ក្រុមហ៊ុនទាំងពីរទទួលបានការអនុញ្ញាតកាលពីដើមខែ ហើយខណៈដែល Samsung Display ទទួលបានសិទ្ធផ្គត់ផ្គង់អេក្រង់សម្រាប់ iPhone 16 ទាំងបួនម៉ូដែល ក្រុមហ៊ុន LG Display នឹងផ្គត់ផ្គង់អេក្រង់សម្រាប់តែម៉ូដែល iPhone 16 Pro ប៉ុណ្ណោះ។ បន្ថែមពីនេះ ក្រុមហ៊ុន BOE រំពឹងថានឹងជួយផ្គត់ផ្គង់អេក្រង់សម្រាប់ iPhone 16 និង iPhone 16 Plus។
ការអនុញ្ញាតនេះអាចថាជារឿងសំខាន់សម្រាប់ LG Display ដែលកន្លងមកធ្លាប់ពិបាកក្នុងការបំពេញតាមលក្ខខណ្ឌរបស់ Apple លើកាលបរិច្ឆេទផលិត។ ជាក់ស្ដែងឆ្នាំមុន LG Display ទទួលបានការអនុញ្ញាតផលិតអេក្រង់ iPhone 15 Pro ក្រោយ Samsung ប៉ុន្មានខែ ដែលអាចឲ្យ Samsung លក់អេក្រង់បានក្នុងតម្លៃថ្លៃ និងក្ដោបក្ដាប់ចំណែកទីផ្សារបានច្រើន។
ក្រុមហ៊ុន Samsung Display រំពឹងថានឹងឆ្លងកាត់ដំណើរការនៃការអនុញ្ញាតផលិតអេក្រង់ iPhone 16 Pro Max នាចុងខែនេះ ហើយ LG Display អាចនឹងឆ្លងកាត់នៅពាក់កណ្ដាលខែមិថុនា។ បច្ចុប្បន្ន Samsung Display ទទួលបានការអនុញ្ញាតសម្រាប់ផលិតអេក្រង់ iPhone 16 និង iPhone 16 Pro៕