វិបសាយព័ត៌មានបារាំង Numerama បានសម្ភាសន៍បុគ្គលិកជាន់ខ្ពស់ Apple ចំនួនបីរូប អំពី iPad Pro ថ្មីដែលបានប្រកាសចេញកាលពីដើមខែ។ កំឡុងពេលសម្ភាសន៍ មិនមានព័ត៌មានថ្មីច្រើនបានបង្ហាញនោះទេ ប៉ុន្តែមានការលើកឡើងអំពីការផ្លាស់ប្ដូរមួយសម្រាប់ iPad នៅថ្ងៃខាងមុខ។
ដូចដែលដឹងហើយថាឡូហ្គោ Apple នៅខាងក្រោយ iPad បានរចនាជាស្ទីលបញ្ឈរ ប៉ុន្តែផលិតផលនេះភាគច្រើនត្រូវបានប្រើជាលក្ខណៈផ្ដេកដោយមានក្ដារចុចជាប់ជាមួយ ដែលធ្វើឲ្យឡូហ្គោ Apple បង្ហាញរាងបញ្ច្រាស។ មិនតែប៉ុណ្ណោះ Apple ក៏បានប្ដូរទីតាំងកាមេរ៉ានៅលើ iPad Pro និង iPad Air ថ្មី ដែលធ្វើឲ្យវាស្ថិតនៅចំផ្នែកកណ្ដាលខាងលើនៅពេលដែលប្រើប្រាស់ជាផ្ដេក។
ជាមួយប្រជាប្រិយភាពនៃការប្រើប្រាស់ផ្ដេក អ្នកឌីហ្សាញផលិតផល Apple ឈ្មោះថា Molly Anderson បានលើកឡើងថា ឡូហ្គោមានរាងជាផ្ដេក អាចនឹងកើតមានឡើងលើ iPad ថ្ងៃអនាគត។
លោកបានលើកឡើងថា ៖ “ខ្ញុំគិតថាវាអាចនឹងផ្លាស់ប្ដូរ។ ពួកយើងកំពុងគិតគូរអំពីវា។ iPad ធ្លាប់ជាផលិតផលដែលប្រើប្រាស់បែបបញ្ឈរ ប៉ុន្តែការប្រើប្រាស់បែបផ្ដេកកាន់តែពេញនិយម៕”