នាពេលកន្លងមក ឈីប Tensor របស់ Google គឺស្ថិតក្រោមការសហការផលិតជាមួយក្រុមហ៊ុន Samsung ពោលចាប់តាំងពីឈីបជំនាន់ទីមួយដែលបានប្រកាសចេញកាលពីឆ្នាំ២០២១។ កិច្ចសហការនេះឃើញថាឈីប Tensor នៅខ្សោយត្រង់សមត្ថភាពគ្រប់គ្រងកម្ដៅ និងភាពធន់នៃការកាន់ថ្ម ជាចំណុចមួយដែល Samsung មិនអាចប្រៀបនឹង TSMC បាន។
អ្វីដែលជាដំណឹងល្អនោះគឺថានឹងមានការផ្លាស់ប្ដូរឆាប់ៗ។ កាលពីចុងឆ្នាំកន្លងទៅ ស្ថាប័នព័ត៌មាន Android Authority បានបញ្ជាក់ថាឈីប Tensor G4 ប្រើលើ Pixel 9 នឹងផលិតដោយ Samsung ហើយនឹងមានភាពល្អប្រសើរតិចជាងមុនតិចតួចប៉ុណ្ណោះ។
យ៉ាងណាក្ដី ការលេចធ្លាយថ្មីៗនេះ បានឲ្យតម្រុយថា Tensor G5 នឹងផលិតដោយក្រុមហ៊ុន TSMC វិញ ដែលនឹងជាលើកដំបូងសម្រាប់ Google ក្នុងការផលិតឈីបដោយមិនមាន Samsung ជួយ។
បើផ្អែកតាមព័ត៌មានប្រទះឃើញដោយ Android Authority អាចបញ្ជាក់បានថាដំណឹងសហការជាមួយ TSMC គឺជាដំណឹងពិតប្រាកដ។
ក្នុងព័ត៌មាននោះ ក៏មានការរំលឹកអំពីឈីបដែលមាន RAM ទំហំ 16GB ផលិតដោយក្រុមហ៊ុន Samsung ដែលវាស៊ីគ្នានឹងចចាមអារ៉ាមថា Pixel 9 Pro នឹងដំឡើង RAM ដល់ទំហំ 16GB ហើយវាអាចនឹងជាស្តង់ដារសម្រាប់ Pixel 10 ផងដែរ៕