អំឡុងពាក់កណ្ដាលខែឧសភា អ្នកប្រើប្រាស់ iPhone ជាច្រើននិយាយថា នៅសុខៗរូបភាពដែលបានលុបចោលមកជាយូរហើយនោះ ដែលរួមមានទាំងរូបភាពស្រើបស្រាលមួយចំនួនផង បានលេចចេញនៅលើ iCloud នៅក្នុងអាល់ប៊ុម “Recent Uploads” ក្រោយពួកគេដំឡើង iOS 17.5។
ពេលនោះ Apple មិនបានឆ្លើយតបលើបញ្ហានេះឡើយ ហើយមានអ្នកប្រើប្រាស់កាន់តែច្រើនបានរាយការណ៍ពីបញ្ហានេះ ហើយក្រោយមក Apple ក៏បានបញ្ចេញកំណែទម្រង់ iOS 17.5.1 ដើម្បីជួសជុលបញ្ហានេះ។
ក្រោយមកទៀត អ្នកតំណាង Apple ក៏បានបកស្រាយជុំវិញបញ្ហានេះ ដោយដើមហេតុគឺដោយសារកំហុសបច្ចេកទេសនៃប្រព័ន្ធទិន្នន័យមិនទាក់ទងនឹង iCloud ឡើយ។ Apple បានបញ្ជាក់ថាខ្លួនមិនមានសិទ្ធិចូលទៅកាន់រូបភាព ឬវីដេអូរបស់អ្នកប្រើប្រាស់ឡើយ។
លើសពីនេះ អ្នកតំណាង Apple បញ្ជាក់ទៀតថា វាមិនអាចទៅរួចនោះទេ ដែលរូបភាពចាស់ៗលើ iPhone ឬ iPad ដែលលក់ឲ្យអ្នកដទៃ អាចលេចចេញមកវិញ ព្រោះថា iPhone ឬ iPad ទាំងនោះ បានឆ្លងកាត់ការ Reset ដែលមានន័យថាទិន្នន័យគ្រប់យ៉ាងគឺបានលុប៕