នាពេលថ្មីៗនេះគេបានឃើញរូបភាពធៀបគ្នារវាង iPhone 15 Pro Max និង iPhone 16 Pro Max ដែលបង្ហាញឲ្យឃើញអំពីភាពខុសគ្នានៃទំហំរបស់ពួកវា។ នៅពេលនេះអ្នកវិភាគ Ming-Chi Kuo បានរាយការណ៍អំពីថ្មនៃ iPhone 16 Pro Max ដោយអះអាងថាវានឹងមានថ្មដែលមានដង់ស៊ីតេថាមពលខ្ពស់ជាងមុន។
បើតាមអ្នកវិភាគរូបនេះ iPhone 16 Pro Max ដែលថ្មមានដង់ស៊ីតេខ្ពស់ជាងមុន នឹងផ្ដល់ជូននូវរយៈពេលប្រើប្រាស់បានកាន់តែយូរជាងមុន នៅក្នុងរូបរាងដូចគ្នានឹងថ្មដែលមានប្រើលើ iPhone 15 Pro Max។
ដង់ស៊ីតេថាមពលខ្ពស់ជាងមុន នឹងបញ្ចេញកម្ដៅកាន់តែខ្លាំង ដែលនេះជាហេតុផលលេចចេញចចាមអារ៉ាមថា Apple នឹងប្រើប្រាស់ស្រោមធ្វើអំពីដែកអ៊ីណុកដើម្បីស្រោបជុំវិញថ្ម ដើម្បីពង្រឹងលើការគ្រប់គ្រងកម្ដៅ។
អ្នកវិភាគ Ming-Chi Kuo បានលើកឡើងថាសម្បកដែកអ៊ីណុកនេះនឹងធ្វើឲ្យការដូរថ្មកាន់តែងាយជាងមុន ដែលទំនងជាអាចជួយឲ្យ Apple អាចអនុលោមតាមតម្រូវការរបស់សហភាពអឺរ៉ុប ដែលទាមទារឲ្យស្មាតហ្វូនអាចប្ដូរថ្មបាន៕