Samsung បានមានឱកាសមួយទៀតហើយក្នុងការឌឺដងក្រុមហ៊ុន Apple ទាក់ទងនឹងវីដេអូពាណិជ្ជកម្មដ៏រស៊ើបសម្រាប់ iPad ជំនាន់ថ្មីដែលមានចំណងជើងថា “Crush!” ដោយ Samsung បានបញ្ចេញវីដេអូពាណិជ្ជកម្មផ្លែផ្កាផ្សព្វផ្សាយអំពី Galaxy Tab S9 Ultra ជាមួយពាក្យស្លោកថា “Creativity cannot be crushed” (ភាពច្នៃប្រឌិតមិនអាចកម្ទេចបានឡើយ)។
ដំណើរដើមទងនោះគឺនៅពេលប្រកាសចេញ iPad Pro M4 កាលពីសប្ដាហ៍មុន ក្រុមហ៊ុន Apple បានបង្ហាញវីដេអូបង្ហាញអំពីការកម្ទេចឧបករណ៍បង្កើតភាពច្នៃប្រឌិតដូចជាឧបករណ៍តន្ត្រី គ្រឿងអេឡិចត្រូនិក ជក់គូរគំនូរ កុំព្យូទ័រ កាមេរ៉ា និងឧបករណ៍ជាច្រើនទៀត ដោយមានគោលបំណងបង្ហាញថា iPad អាចជំនួសឲ្យឧបករណ៍ទាំងអស់នោះបាន។
វីដេអូនេះ ទទួលបានការវាយប្រហារជាច្រើនពីសហគមន៍ច្នៃប្រឌិត និងបណ្ដាញសង្គម ដោយបានលើកឡើងថាក្រុមហ៊ុនបច្ចេកវិទ្យាមិនបានឲ្យតម្លៃលើឧស្សាហកម្មច្នៃប្រឌិត និងបុគ្គលច្នៃប្រឌិត។
ដោយទទួលបានសារវាយប្រហារច្រើនពេល Apple បានសម្រេចលុបចោលផែនការផ្សព្វផ្សាយវីដេអូ iPad Pro លើទូរទស្សន៍ និងបានចេញសារសូមទោសថែមទៀតផង។
https://x.com/SamsungMobileUS/status/1790824457365594487
ដោយឃើញថាមានឱកាសល្អ Samsung បានបញ្ចេញវីដេអូពាណិជ្ជកម្មផ្ទាល់ខ្លួន ដែលក្នុងនោះបង្ហាញអំពីតន្ត្រីករម្នាក់ដើរកាត់ឧបករណ៍កម្ទេច និងបានរើសយកហ្គីតាដែលខ្ទេចមួយ។ តន្ត្រីករនោះក៏បានអង្គុយចុះនិងលេងហ្គីតា ក្បែរ Galaxy Tab S9 Ultra ដែលមានបង្ហាញណូតភ្លេងនៅលើនោះ។
វីដេអូត្រូវបានបង្ហោះលើគណនី X របស់ Samsung អមជាមួយនឹង Caption ថា “We would never crush creativity” (យើងនឹងមិនបំផ្លាញភាពច្នៃប្រឌិតឡើយ)៕