នៅឆ្នាំនេះ iPhone 16 Pro Max រំពឹងថានឹងទទួលបានពង្រីកទំហំពី ៦,៧អ៊ីញ ឡើងដល់ ៦,៩អ៊ីញ ហើយរូបភាពថ្មីមួយ អាចឲ្យយើងឃើញថា iPhone 15 Pro Max នាពេលបច្ចុប្បន្នមានទំហំតូចប៉ុណ្ណាពេលធៀបនឹង iPhone ធំជាងគេរបស់ Apple។
ពាណិជ្ជកម្ម
រូបភាពដែលជាពុម្ពនៃ iPhone 16 Pro Max បានចែកចាយដោយគណនី X ឈ្មោះថា ZONEofTECH។ ពុម្ពនេះត្រូវបានផលិតឡើងក្នុងគោលបំណងធ្វើការបង្ហាញ ឬសម្រាប់ការធ្វើតេស្ត ហេតុនេះវាមានទំហំដូចគ្នានឹង iPhone ដែលត្រៀមប្រកាសចេញ។
iPhone 16 Pro ឯណោះវិញ រំពឹងថានឹងឡើងទំហំពី ៦,១ ទៅ ៦,៣អ៊ីញ ផងដែរ ដែលមានន័យថា iPhone 16 Pro ទាំងពីរនឹងរីកមាឌធំជាងមុន ខណៈដែលកម្រាស់រំពឹងថានឹងរក្សានៅដូចដើម ឯទម្ងន់វិញទំនងជាកើនឡើងបន្តិច។
ដោយឡែក iPhone 16 និង 16 Plus រំពឹងថានឹងនៅតែមានទំហំ ៦,១អ៊ីញ និង ៦,៧អ៊ីញ។ ប្រសិនបើ Apple មិនផ្លាស់ប្ដូរទេ iPhone 16 Series អាចនឹងប្រកាសចេញអំឡុងពាក់កណ្ដាលខែកញ្ញា៕