ក្រុមហ៊ុន vivo បានប្រកាសចេញស្មាតហ្វូនប្រចាំឆ្នាំ២០២៤របស់ខ្លួន ជាម៉ូដែល X100 Ultra ដែលវាមកជាមួយនូវលក្ខណៈសម្បត្តិខ្លាំងមិនធម្មតា អមដោយប្រព័ន្ធកាមេរ៉ាដ៏លេចធ្លោ។
X100 Ultra មានប្រើកាមេរ៉ាគោលទំហំ 50MP ជា Sensor LYT-900 របស់ Sony ដែលមានមុខកាត់ដល់ ១អ៊ីញ ហើយវាមានកាមេរ៉ា Zoom ប្រភេទ Periscope ទំហំដល់ 200MP ជា Sensor ISOCELL HP9 ដែលសហការផលិតជាមួយ Samsung។
កាមេរ៉ា Zoom របស់ vivo X100 Ultra មាន Aperture f/2.67និងមាន focal length 85ម.ម។ វាក៏មានបច្ចេកវិទ្យា Zeiss T* និង Zeiss APO ដែលអាចពង្រឹងលើភាពច្បាស់នៅពេលផលិតរូបភាព Zoom។ កាមេរ៉ានេះ អាច Zoom បែប Optical បាន 3.7 ដង និងមានបច្ចេកវិទ្យារក្សាលំនឹង CIPA 4.5 ដ៏ឈានមុខគេផងដែរ។
ស្មាតហ្វូននេះមានបំពាក់អេក្រង់កោងទំហំ ៦,៧៨អ៊ីញ ជាប្រភេទ AMOLED មាន Refresh Rate អាចប្រែប្រួលពី 1Hz ដល់ 120Hz។ បន្ទះអេក្រង់នេះអាចបាញ់ពន្លឺបានដល់ 3000nits និងមានកាមេរ៉ាមុខទំហំ 50MP អមនឹងទ្រនាប់ស្កេនបង្កប់ខ្លួនលើអេក្រង់។
វាមានប្រើប្រាស់ឈីប Snapdragon 8 Gen 3 ដែលមានជម្រើស RAM ទំហំដល់ 16GB និងអង្គផ្ទុក 1TB។ ថ្មមានទំហំ 5500mAh អាចសាកភ្លើងកម្លាំង 80W និងសាកឥតប្រើខ្សែបានកម្លាំង 30W។ vivo បញ្ជាក់ថា X100 Ultra គាំទ្របច្ចេកវិទ្យា 5.5G និងមុខងារទំនាក់ទំនងតាមផ្កាយរណបសម្រាប់នៅក្នុងប្រទេសចិន។
Vivo X100 Ultra មានតម្លៃចាប់ពី ៨៩៨ដុល្លារ សម្រាប់ 12/256GB និងឡើងដល់ ១១០៥ដុល្លារ សម្រាប់ 16/1TB ដោយវានឹងមានលក់នៅប្រទេសចិននៅថ្ងៃទី២៨ ខែឧសភា៕