ប្រទេសម៉ាឡេស៊ីបានបើកកញ្ចប់ជំនួយថ្មី ចំនួន ១៥ ពាន់លានរីងហ្គីដ ឬប្រហែល ៣,៧ពាន់លានដុល្លារ ដើម្បីជួយដល់សេដ្ឋកិច្ចដែលរងផលប៉ះពាល់ពីការកើនឡើងនូវករណីកូវីដ១៩។
នាយករដ្ឋមន្រ្តីម៉ាឡេស៊ី លោក Muhyiddin Yassin បានថ្លែងនៅក្នុងសុន្ទរកថាតាមទូរទស្សន៍មួយ កាលពីថ្ងៃចន្ទថាផែនការនេះគឺជាសកម្មភាពលើកទី១ ដែលរដ្ឋាភិបាលបានប្រកាសក្នុងឆ្នាំនេះ ដើម្បីជំរុញវិធានការណ៍ដែលមានជាធរមាន ក្នុងការជួយប្រជាជនឲ្យលុបចោលផលប៉ះពាល់សេដ្ឋកិច្ច ដែលបណ្តាលមកពីជំងឺរាតត្បាតកូវីដ១៩។
វិធានការណ៍នេះធ្វើឡើងមួយសប្តាហ៍បន្ទាប់ពីប្រទេសម៉ាឡេស៊ី បានប្រកាសពីភាពអាសន្នដែលអនុញ្ញាតឲ្យរដ្ឋាភិបាលអនុម័តច្បាប់ជាបន្ទាន់ ដើម្បីទប់ស្កាត់ការរីករាលដាលនៃជំងឺរាតត្បាតកូវីដ១៩ និងគាំទ្រដល់សេដ្ឋកិច្ច។ ការផ្លាស់ប្តូរនេះបានធ្វើឲ្យមានការព្រួយបារម្ភអំពីផលប៉ះពាល់អវិជ្ជមាន ដែលអាចកើតមានលើស្ថេរភាពទីផ្សារ និងបរិយាកាសវិនិយោគ។
រហូតមកដល់ពេលនេះ ប្រទេសម៉ាឡេស៊ីបានកត់ត្រានូវចំនួនករណីកូវីដ១៩ រហូតដល់ទៅ ៤ ០២៩ ករណី កាលពីថ្ងៃសៅរ៍ហើយមិនរំពឹងថានឹងមានភាពប្រសើរឡើងវិញឡើយរហូតដល់ខែឧសភា។
យ៉ាងណាមិញ លោក Muhyiddin បាននិយាយថា ផែនការចាក់ថ្នាំបង្ការជំងឺកូវីដ១៩ របស់ប្រទេសកំពុងដំណើរការហើយ ដោយការចាក់វ៉ាក់សាំងដំបូងគេគ្រោងនឹងចាប់ផ្តើមនៅដើមខែមីនាតែម្តង៕