សមាគមអ្នកផលិតម៉ូតូនៅប្រទេសវៀតណាម Vietnam Association of Motorcycle Manufacturers (VAMM) បានឲ្យដឹងថា ការលក់ម៉ូតូបានធ្លាក់ចុះ ១៦,៦ ភាគរយ ស្មើនឹង ២,៧១ លានគ្រឿង កាលពីឆ្នាំមុន។
ក្រុមឧស្សាហកម្មនេះមានក្រុមហ៊ុនធំៗ ចំនួន ៥ គឺ Honda, Piaggio, Suzuki, SYM និង Yamaha ដែលកាន់កាប់ទីផ្សារភាគច្រើន។ អ្នកនៅក្នុងឧស្សាហកម្មបាននិយាយថា ការលក់បានធ្លាក់ចុះទ្វេដង ដោយសារតែជំងឺរាតត្បាតកូវីដ១៩ ដែលបានប៉ះពាល់ដល់ប្រាក់ចំណូលរបស់ប្រជាជន។
ទោះបីជារបាយការណ៍របស់ VAMM មិនបានចុះបញ្ជីការលក់របស់ក្រុមហ៊ុននីមួយៗក៏ដោយ ក៏ Honda បាននិយាយថា វាលក់ម៉ូតូបានចំនួនជិត ៨០ ភាគរយ នៃតួលេខលក់សរុប។ ម៉ាកផ្សេងទៀតដែលមិនត្រូវបានរាប់បញ្ចូលនៅក្នុងរបាយការណ៍ រួមមាន VinFast, Kymco, BMW Motorrad, Ducati, Harley-Davidson, Kawasaki និងក្រុមហ៊ុនដទៃទៀត។
គួរឲ្យដឹងថា នៅឆមាសទី ២ កាលពីឆ្នាំមុន ក្រុមហ៊ុនជាច្រើនបានចេញម៉ូដែលថ្មីៗ ដូចជា Honda Vision ឆ្នាំ២០២១ និង Yamaha Exciter 155 ជាដើម៕