កាលពីថ្ងៃសៅរ៍ ទី១៦ មករា កន្លងទៅនេះ ក្រុមហ៊ុន Facebook បានឲ្យដឹងថា ខ្លួននឹងហាមឃាត់ការផ្សាយពាណិជ្ជកម្មសម្រាប់គ្រឿងសម្ភារៈអាវុធ និងឧបករណ៍ការពារ នៅសហរដ្ឋអាមេរិក ដែលមានប្រសិទ្ធិភាពភ្លាមៗរហូតដល់យ៉ាងហោចណាស់ ពីរថ្ងៃបន្ទាប់ពីថ្ងៃស្បថចូលកាន់តំណែងរបស់ប្រធានាធិបតីអាមេរិក Joe Biden នៅថ្ងៃទី ២០ ខែមករា។
បន្ទាប់ពីការវាយប្រហាររបស់ក្រុមអ្នកគាំទ្រលោកប្រធានាធិបតី ដូណាល់ ត្រាំ នៅថ្ងៃទី ៦ ខែមករា រួចមក ក្រុមហ៊ុនប្រព័ន្ធបណ្តាញសង្គមខាងលើ បាននិយាយថា ឥឡូវនេះវានឹងហាមឃាត់ការផ្សាយពាណិជ្ជកម្មសម្រាប់គ្រឿងបន្លាស់ ដូចជា ទូរកាំភ្លើង អាវកាក់ការពារគ្រាប់ និង ខ្សែ-ស្រោមកាំភ្លើង នៅសហរដ្ឋអាមេរិក។
ក្រុមហ៊ុន Facebook បានឲ្យដឹងនៅក្នុងការបង្ហោះមួយថា “យើងបានហាមឃាត់ការផ្សាយពាណិជ្ជកម្មអំពីអាវុធ គ្រាប់រំសេវ និងការកែច្នៃអាវុធ ដូចជាធ្វើឲ្យស្ងាត់ជាដើម។ ប៉ុន្តែឥឡូវនេះ យើងក៏នឹងហាមឃាត់ការផ្សាយពាណិជ្ជកម្មសម្រាប់គ្រឿងប្រើប្រាស់ជាមួយកាំភ្លើងដែរ”។
គួរឲ្យដឹងថា សមាជិកព្រឹទ្ធសភាអាមេរិក ៣ រូប បានផ្ញើលិខិតមួយទៅនាយកប្រតិបត្តិ Facebook លោក Mark Zuckerberg កាលពីថ្ងៃសុក្រ ដោយស្នើឲ្យលោករារាំងជាអចិន្ត្រៃយ៍ នូវការផ្សាយពាណិជ្ជកម្មនៃផលិតផលដែលត្រូវបានរចនាឡើងយ៉ាងច្បាស់ ដើម្បីប្រើប្រាស់ក្នុងការប្រយុទ្ធប្រដាប់អាវុធ៕