ក្រុមហ៊ុនអាកាសចរណ៍វៀតណាម Vietjet Air គ្រោងនឹងពង្រីកការវិនិយោគរបស់ខ្លួនលើយន្ដហោះ និងបរិក្ខារបច្ចេកទេសថ្មី នៅឆ្នាំ២០២១នេះ បន្ទាប់ពីបានរាយការណ៍ពីប្រាក់ចំណេញតិចតួច ក្នុងឆ្នាំ ២០២០ ទោះបីមានជំងឺរីករាតត្បាតកូវីដ១៩ ក៏ដោយ។
លោក Nguyen Thi Phuong Thao នាយកប្រតិបត្តិក្រុមហ៊ុន Vietjet បាននិយាយនៅក្នុងបទសម្ភាសន៍មួយ កាលពីថ្ងៃទី៩ ខែមករា ថា “ក្នុងឆ្នាំ ២០២១ យើងរំពឹងថា នឹងបន្តទទួលបានយន្តហោះទំនើបថ្មី ហើយនឹងវិនិយោគលើកន្លែងថែទាំ និងបណ្តុះបណ្តាល ហើយការវិនិយោគនឹងខ្ពស់ជាងឆ្នាំ ២០២០ ទៅទៀត”។
ជាមួយគ្នានេះ ក្រុមហ៊ុន Vietjet បានឲ្យដឹងដាច់ដោយឡែកពីគ្នា កាលពីថ្ងៃពុធថា ខ្លួនបានរៃអង្គាសប្រាក់ចំនួន ២៨ លានដុល្លារ តាមរយៈការចេញប័ណ្ណបំណុលកាលពីខែមុន ដើម្បីផ្តល់មូលនិធិដល់ផែនការអភិវឌ្ឍរបស់ខ្លួន នៅក្នុងឆ្នាំ ២០២១។ ទោះជាយ៉ាងណាក៏ដោយ វាមិនបានផ្តល់ព័ត៌មានលម្អិតបន្ថែមអំពីប័ណ្ណបំណុលនេះឡើយ។
គួរឲ្យដឹងថា ប្រទេសវៀតណាមបានទទួលជោគជ័យក្នុងការទប់ស្កាត់ជំងឺកូវីដ១៩ នេះ ដោយមានវិធានការទប់ស្កាត់ និងតាមដានជាបន្តបន្ទាប់។ ជាមួយនឹងការឆ្លងសរុបជាង ១ ៥០០ ករណី និងមនុស្ស ៣៥ នាក់បានស្លាប់ វាបានបន្តសកម្មភាពសេដ្ឋកិច្ចលឿនជាងគេនៅអាស៊ី៕