ការហាមឃាត់របស់អាមេរិក លើក្រុមហ៊ុន Xiaomi ទំនងជាមិនធ្វើឲ្យការលក់របស់ក្រុមហ៊ុនផលិតស្មាតហ្វូនចិននេះធ្លាក់ចុះនោះទេ ដរាបណាក្រុមហ៊ុនមិនត្រូវបានដកហូតសិទ្ធិចូលប្រើ Google Mobile Service (GMS) នោះ។
គួរឲ្យដឹងថា កាលពីថ្ងៃព្រហស្បតិ៍កន្លងទៅនេះ ក្រុមហ៊ុន Xiaomi ស្ថិតនៅក្នុងចំណោមក្រុមហ៊ុនចិនចំនួន ៩ ដែលត្រូវបានបញ្ចូលទៅក្នុងបញ្ជីរបស់មន្ទីរបញ្ចកោណ ដែលចោទប្រកាន់ថាពួកគេមានទំនាក់ទំនងជាមួយយោធាចិន។
ក្រុមហ៊ុនទាំងនេះនឹងត្រូវស្ថិតក្រោមការហាមឃាត់ការវិនិយោគថ្មីរបស់សហរដ្ឋអាមេរិក ដែលបង្ខំឲ្យវិនិយោគិនអាមេរិកបញ្ឈប់ក្រុមហ៊ុនដែលជាប់ក្នុងបញ្ជីខ្មៅ នៅត្រឹមថ្ងៃទី១១ ខែវិច្ឆិកា។ គិតមកត្រឹមពេលនេះ ក្រុមហ៊ុនចិនសរុបចំនួន ៤៤ ហើយត្រូវបានជាប់ក្នុងបញ្ជីខ្មៅនោះ។
បញ្ជីខ្មៅដាច់ដោយឡែកមួយទៀត ដែលត្រូវបានគេស្គាល់ថា Entity List និងចេញដោយក្រសួងពាណិជ្ជកម្មសហរដ្ឋអាមេរិក ត្រូវបានគេមើលឃើញថាកាន់តែធ្ងន់ធ្ងរ ព្រោះវាហាមឃាត់ក្រុមហ៊ុនអាមេរិកមិនឲ្យផ្គត់ផ្គង់អង្គភាពទាំងនោះដោយគ្មានអាជ្ញាប័ណ្ណ។ ទោះជាយ៉ាងណាក៏ដោយ ក្រុមហ៊ុន Xiaomi ដែលពឹងផ្អែកយ៉ាងខ្លាំងលើបន្ទះឈីបពីក្រុមហ៊ុនអាមេរិក Qualcomm មិនមាននៅក្នុងបញ្ជីនេះទេ៕