ស្មាតហ្វូន Sony Xperia 1 VI បានលេចធ្លាយរូបភាពផ្សព្វផ្សាយផ្លូវការដែលបានចែកចាយដោយប្រភពល្បីឈ្មោះ Evan Blass។ តាមរយៈរូបភាពនេះ គេអាចដឹងមុនអំពីចំណុចពិសេសៗជាច្រើនដែលនឹងមាននៅលើស្មាតហ្វូនថ្មីរបស់ Sony។
អ្វីដែលគួរឲ្យកត់សម្គាល់គឺការបង្ហាញអំពី កាមេរ៉ាគោលដែលប្រើប្រាស់ឡេន “Exmor T for mobile” សមត្ថភាពសាកថ្មឥតប្រើខ្សែ និងអាចសាកថ្មឲ្យឧបករណ៍ដទៃ ជាមួយនឹងមុខងារលេងហ្គេម ក៏ដូចជាការតម្រៀបនៃកាមេរ៉ាខាងក្រោយផងដែរ។
រូបភាពបង្ហាញថាទៀតថា អេក្រង់របស់ Xperia 1 VI នឹងដំណើរការដោយ Bravia engine របស់ Sony ដែលវាមាន Refresh Rate អាចប្រែប្រួលពី 1Hz ដល់ 120Hz និងមានពន្លឺភ្លឺជាងមុន ១,៥ដង។
គេឃើញដែរថា Sony ហាក់សង្កត់ធ្ងន់លើផ្នែកសម្លេង ដោយ Sony Xperia 1 VI នឹងមានបច្ចេកវិទ្យា Hi-Res audio ក៏ដូចជា Hi-Res wireless audio រួមជាមួយមុខងារសម្លេងជុំវិញ ៣៦០ដឺក្រេ មានគាំទ្រ LDAC និង DSEE Ultimate ដែលបង្កើនគុណភាពសម្លេង។
បន្ថែមពីលើ Sony Xperia 1 VI ក៏ឃើញមានការលេចធ្លាយអំពី Xperia 10 VI ផងដែរ ដោយស្មាតហ្វូនទាំងពីរនឹងប្រកាសចេញនៅថ្ងៃទី១៧ ខែឧសភា៕