ក្រុមហ៊ុន Huawei បានប្រកាសចេញស្ងាត់ៗនូវស្មាតហ្វូន Pura 70 Series សម្រាប់ទីផ្សារអន្តរជាតិ ដែលក្នុងនោះរួមមាន Pura 70, Pura 70 Pro និង Pura 70 Ultra ដោយបន្សល់ទុក Pura 70 Pro+ លក់ផ្ដាច់មុខសម្រាប់អតិថិជនចិន។
ស្មាតហ្វូន Pura 70 ទាំងបីមានលក់នៅប្រទេសចិនរួចហើយ ហេតុនេះលក្ខណៈសម្បត្តិរបស់វាគឺត្រូវបានអ្នកគាំទ្រស្គាល់រួចទៅហើយ។ មុខងារដែលលេចធ្លោនោះគឺកាមេរ៉ាផ្នែកខាងក្រោយ ដែលមានបំពាក់កាមេរ៉ាប្រភេទផ្សេងៗគ្នាលើម៉ូដែលបី។
Huawei Pura 70 មានកាមេរ៉ាគោលទំហំ 50MP អមជាមួយកាមេរ៉ា Periscope Telephoto ទំហំ 12MP អាច Zoom Optical 5x និងមានកាមេរ៉ា Ultrawide ទំហំ 13MP។ ចំណែក 70 Pro រក្សាកាមេរ៉ាគោល 50MP ប៉ុន្តែកាមេរ៉ា Telephoto ឡើងដល់ 48MP អាច Zoom Optical 3.5x និងប្រើកាមេរ៉ា កាមេរ៉ា Ultrawide 12.5MP។
តួឯកសំខាន់នោះគឺ Huawei Pura 70 Ultra ដែលមានកាមេរ៉ាគោលមាន Sensor ទំហំដល់ ១អ៊ីញ ហើយជាប្រភេទ Retractable Len ដែលអាចពង្រីកខ្លួនបាន ហើយវាអាចប្រែប្រួល Aperture ពី f/1.6 ដល់ f/4.0។ កាមេរ៉ា Telephoto មានទំហំ 50MP អាច Zoom Optical 3.5x និងកាមេរ៉ា Ultrawide ទំហំ 40MP។
Huawei Pura 70 មានលក់ជាមួយ RAM ទំហំ 12GB និងអង្គផ្ទុក 256GB ជាមួយតម្លៃប្រមាណ ១០៦៨ដុល្លារ លើទីផ្សារអឺរ៉ុប។ ចំណែក Pura 70 Pro មានអង្គផ្ទុកទំហំ 512GB តម្លៃប្រមាណ ១២៨២ដុល្លារ និង Pura 70 Ultra មាន RAM 16GB និងអង្គផ្ទុកទំហំ 512GB តម្លៃប្រមាណ ១៦០០ដុល្លារ៕