ក្រុមហ៊ុន Google បានបង់ប្រាក់ ២០ពាន់លានដុល្លារ ទៅឲ្យក្រុមហ៊ុន Apple កាលពីឆ្នាំ២០២២ ដើម្បីក្លាយជា Default Search Engine សម្រាប់កម្មវិធី Safari នៅលើ iPhone, iPad និង Mac។ នេះបើតាមការចុះផ្សាយរបស់ Bloomberg។
ព័ត៌មានពីការបង់ប្រាក់នេះបានបង្ហាញនៅក្នុងឯកសារតុលាការដែល Google បានផ្ដល់ជូនក្នុងជម្លោះក្ដីក្ដាំការប្រកួតប្រជែងលើទីផ្សារជាមួយនឹងក្រសួងយុត្តិធម៌សហរដ្ឋអាមេរិក។
ក្រសួងយុត្តិធម៌សហរដ្ឋអាមេរិក បានចោទប្រកាន់ថា Google មានភាពផ្ដាច់មុខខ្លាំងពេកលើ Search Engine ហើយកិច្ចព្រមព្រៀងរបស់ Google ជាមួយនឹង Apple បានក្លាយជាចំណុចដែលផ្ដោតសំខាន់មួយ។
កាលពីខែវិច្ឆិកា ឆ្នាំមុន ឯកសារពាក្យបណ្ដឹងបានចង្អុលបង្ហាញថា Google បានចំណាយឲ្យ Apple ចំនួន ៣៦% នៃចំណូលសរុបដែលខ្លួនទទួលបានតាមរយៈការ Search នៅលើ Safari ហើយពេលនេះគេដឹងថាវាគឺស្មើនឹង ២០ពាន់លានដុល្លារ។
គួរដឹងថា Google បានក្លាយជា Default Search Engine នៅលើឧបករណ៍ Apple តាំងពីឆ្នាំ២០០២ តាមរយៈកិច្ចព្រមព្រៀងដែលបានចរចាឡើងវិញអស់ជាច្រើនលើក៕