Samsung បានបើកឆាកឆ្នាំ២០២៤ ជាមួយជោគជ័យលើសពីការរំពឹង តាមរយៈការប្រកាសចេញ Galaxy S24 Series ដែលពាំនាំនូវមុខងារ Galaxy AI ដ៏ទាក់ទាញ។ ឆាប់ៗខាងមុខនេះ Samsung នឹងប្រកាសចេញស្មាតហ្វូនកំពូលមួយម៉ូដែលទៀតប្រចាំឆ្នាំ២០២៤ ដែលជាស្មាតហ្វូនបត់ Z Fold6 និង Z Flip6។
កាលពីខែកុម្ភៈ គេដឹងថាការប្រកាសចេញស្មាតហ្វូនបត់ថ្មីរបស់នឹងធ្វើឡើងនាខែកក្កដា ហើយពេលនេះគេបានដឹងអំពីកាលបរិច្ឆេទច្បាស់លាស់ហើយ។ បើតាមការចុះផ្សាយរបស់ SamMobile ដែលបានបញ្ជាក់ជាមួយប្រភពជាច្រើននោះ ការប្រកាសចេញនឹងធ្វើឡើងនៅថ្ងៃទី ១០ ខែកក្កដា។ សម្រាប់ទីតាំងគឺនឹងធ្វើឡើងនៅឯទីក្រុងប៉ារីស ប្រទេសបារាំង។
តាមរយៈដំណឹងលេចធ្លាយកន្លងមក Z Fold6 និង Z Flip6 នឹងមិនមានការផ្លាស់ប្ដូររូបរាងខ្លាំងឡើយ ប៉ុន្តែសម្រាប់ Z Fold6 អាចនឹងមានលើសពីមួយប្រភេទ ពោលអាចនឹងមានប្រភេទធូរថ្លៃ និងប្រភេទថ្លៃខ្លាំងដែលជា Z Fold6 Ultra។
ក្នុងព្រឹត្តិការណ៍នៅខែកក្កដា គេរំពឹងថា Samsung ក៏អាចនឹងប្រកាសចេញចិញ្ចៀនវៃឆ្លាត Galaxy Ring ដែលបានបង្ហាញរូបរាងខ្លះៗកាលពីខែមករា អមជាមួយនឹងការបង្ហាញចេញនូវ Galaxy Watch 7 ផងដែរ៕