កាលពីថ្មីៗកន្លងទៅ ប្រធានាធិបតីសហរដ្ឋអាមេរិកលោក Joe Biden បានចុះហត្ថលេខាលើសេចក្ដីព្រាងច្បាប់អន្តរជាតិ ដែលក្នុងនោះមានការបិទបណ្ដាញសង្គម TikTok មិនឲ្យដំណើរការនៅអាមេរិកផងដែរ។
TikTok គ្រប់គ្រងដោយក្រុមហ៊ុនចិន ByteDance និងត្រូវបានអាមេរិកជឿថាវាជាការគំរាមកំហែងធំដល់សន្តិសុខជាតិ ដោយសារប្រជាប្រិយភាពលើសលប់របស់បណ្ដាញសង្គម TikTok រួមផ្សំនឹងទំនាក់ទំនងជិតស្និទ្ធិនៃក្រុមហ៊ុន ByteDance ជាមួយរដ្ឋាភិបាលចិន។
លោក Biden បានទុកពេលឲ្យក្រុមហ៊ុន ByteDance រយៈពេល៩ខែ ក្នុងការលក់ TikTok ឲ្យក្រុមហ៊ុនដែលមិនមែនជាចិន ឬក៏ត្រូវប្រឈមមុខនឹងការបិទដំណើរការនៅទូទាំងសហរដ្ឋអាមេរិក។
ពេលនេះការចុះផ្សាយរបស់ Reuters ឲ្យដឹងថា ByteDance មិនមានគម្រោងលក់ TikTok ឡើយ ដោយក្រុមហ៊ុននឹងព្យាយាមដោះស្រាយតាមផ្លូវច្បាប់ជាមុនសិន។ ប្រសិនផ្លូវច្បាប់មិនបានផលវិជ្ជមានទេនោះ ByteDance ត្រៀមខ្លួនបិទដំណើរការនៅអាមេរិក ដោយមិនលក់ឲ្យក្រុមហ៊ុនដទៃឡើយ។
ការចុះផ្សាយរបស់ Reuters ដែលបានដកស្រង់ចេញពីប្រភពមួយ បានអះអាងថាចំណូលរបស់ TikTok នៅអាមេរិក មិនមានច្រើនដូចដែលគ្រប់គ្នាយល់ឃើញឡើយ។ ជាក់ស្ដែង ការបិទនៅអាមេរិក នឹងមានផលប៉ះពាល់តិចតួចប៉ុណ្ណោះលើចំណូលរបស់ ByteDance៕