ការចុះផ្សាយថ្មីដែលដកស្រង់ប្រភពចេញពីខ្សែសង្វាក់ផ្គត់ផ្គង់បានឲ្យដឹងថា Apple បានដាក់ការកុម្ម៉ង់ពីដៃគូផ្គត់ផ្គង់នូវប្រព័ន្ធប៊ូតុងថ្មីប្រភេទ Capacitive Button ដែលនឹងជំនួសឲ្យប៊ូតុងគ្រាប់ចុចនៅលើ iPhone 16។
កាលពីឆ្នាំមុន ចចាមអារ៉ាមដែលបានចែកចាយ បានលើកឡើងថា iPhone 15 អាចនឹងប្ដូរប្រើប៊ូតុងថ្មីប្រភេទ Capacitive Button។ យ៉ាងណាគម្រោងការនេះត្រូវបានលុបចោល ដោយសារបញ្ហាប្រឈមកើតមាននៅពេលផលិត ដែលអាចនឹងពន្យារពេលដល់ការប្រកាសចេញ iPhone 15។
ពេលនេះដែរ ប្រភពចេញពី Economic Daily News និយាយថា Apple បានដាក់បញ្ជាការកុម្ម៉ង់ប៊ូតុងប្រភេទថ្មីនេះពីក្រុមហ៊ុន Advanced Semiconductor Engineering ដែលនេះជាការឲ្យតម្រុយថាប៊ូតុងនេះនឹងបង្ហាញវត្តមានលើ iPhone 16 ប្រកាសចេញឆ្នាំនេះ។ ការកុម្ម៉ង់ទិញនេះ មានបញ្ចូលនូវបង្គុំ system-in-a-package ដើម្បីជំនួសចូលមកប៊ូតុងគ្រាប់ចុចនៅផ្នែកទាំងសងខាងនៃ iPhone 16។
វាក៏នឹងមានការបន្ថែមនូវគ្រឿងបន្លាស់ Taptic Engine ចំនួនពីរ នៅផ្នែកទាំងសងខាងនៃ iPhone 16 ដោយប៊ូតុងប្រភេទនេះនឹងផ្ដល់ការឆ្លើយតបជារំញ័រនៅពេលចុច ប្រៀបដូចជាប៊ូតុង Home នៅលើ iPhone 7 អ៊ីចឹងដែរ៕