តម្លៃរបស់ស្មាតហ្វូន Google Pixel 8a បានលេចធ្លាយលើវិបសាយលក់រាយនៅប្រទេសកាណាដា ដែលបានបង្ហាញឲ្យឃើញថាតម្លៃរបស់វាឡើងថ្លៃលើស Google Pixel 7a។
ពាណិជ្ជកម្ម
ដូចបានឃើញក្នុងរូបភាពខាងលើ Pixel 8a ទំហំ 128GB មានតម្លៃ ៧០៨,៩៩ដុល្លារកាណាដា ស្មើប្រមាណ ៥១៣ដុល្លារ និងទំហំ 256GB មានតម្លៃ ៧៩២,៩៩ដុល្លារកាណាដា ស្មើនឹងប្រមាណ ៥៧៤ដុល្លារ។
គួរដឹងថា Pixel 7a ចេញលក់នៅប្រទេសកាណាដា ក្នុងតម្លៃចាប់ពី ៥៩៩ដុល្លារកាណាដា សម្រាប់ទំហំ 128GB។ ដូចនេះ Pixel 8a គឺបានឡើងថ្លៃប្រមាណ ១៨% ធៀបនឹង Pixel 7a។
ផ្អែកតាមដំណឹងលេចធ្លាយកន្លងមក ការអាប់ដេតធំសម្រាប់ Pixel 8a គឺនៅលើអេក្រង់ ដោយវានឹងប្រើអេក្រង់ 120Hz ជាលើកដំបូងសម្រាប់ស្មាតហ្វូន Pixel A-Series។ អេក្រង់នេះនឹងមានទំហំ ៦,១អ៊ីញ ប្រភេទ OLED និងជះពន្លឺបានដល់ 1400nits។