ស្មាតហ្វូន Huawei Pura 70 Series បានបង្ហាញវត្តមានជាផ្លូវការក្នុងនាមជាអ្នកស្នងតំណែងស្មាតហ្វូន Huawei P60 Series ដែលបានប្រកាសចេញកាលពីឆ្នាំ២០២៣កន្លងទៅ និងបានក្លាយជាស្មាតហ្វូនដែលមានកាមេរ៉ាល្អដាច់គេមួយប្រចាំឆ្នាំ។
![](https://cambobiz.com/wp-content/uploads/2024/04/gsmarena_007-3.jpg)
គ្រួសារ Huawei Pura 70 Series មានសមាជិកចំនួនបួន រួមមាន Pura 70, Pura 70 Pro, Pura 70 Pro Plus និងបងធំប្រចាំគ្រួសារគឺ Pura 70 Ultra។ Huawei មិនបានប្រាប់ពីឈីបដែលញាត់ក្នុងស្មាតហ្វូននេះទេ ប៉ុន្តែដំណឹងនាពេលកន្លងមកបានអះអាងថាយ៉ាងហោចណាស់មានមួយម៉ូដែលគឺមានប្រើប្រាស់ឈីប Kirin 9010 ដែលមាន CPU ១២គ្រាប់ អមជាមួយ GPU Maleoon 910 ដែលផលិតដោយ Huawei ផ្ទាល់។
![](https://cambobiz.com/wp-content/uploads/2024/04/gsmarena_003-7.jpg)
ស្មាតហ្វូនទាំងបួន មានចំណុចដូចគ្នាមួយចំនួន ដូចជាមានអេក្រង់ OLED អាចបង្ហាញរូបភាពកម្រិត 1.5K និងមាន Refresh Rate 120Hz ប្រភេទ LTPO និងអាចបាញ់ពន្លឺបានខ្ពស់ដល់ 2500nits។ ពួកវាមានកាមេរ៉ា Selfie ទំហំ 13MP, ប្រើ Harmony OS 4.2 និងមានទ្រនាប់ស្កេនខ្ចៅដៃបង្កប់លើអេក្រង់។
![](https://cambobiz.com/wp-content/uploads/2024/04/gsmarena_001-20.jpg)
សម្រាប់ Pro, Pro Plus និង Ultra អាចសាកថ្មប្រើខ្សែកម្លាំង 100W សាកឥតប្រើខ្សែកម្លាំង 80W និងអាចសាកថ្មឲ្យឧបករណ៍ដទៃបានក្នុងកម្លាំង 20W។ ដោយឡែក Huawei Pura 70 ធម្មតាវិញ សាកប្រើខ្សែកម្លាំង 66W សាកឥតខ្សែកម្លាំង 50W និងសាកឲ្យឧបករណ៍ដទៃបានកម្លាំង 7.5W។
![](https://cambobiz.com/wp-content/uploads/2024/04/gsmarena_004-5.jpg)
Huawei Pura 70 Ultra ជាស្មាតហ្វូន Ultra ដំបូងរបស់ Huawei ដែលវាមានភាពលេចធ្លោនៅត្រង់កាមេរ៉ាតែម្ដង។ ក្រុមហ៊ុន Huawei បានបង្អួតពីកាមេរ៉ាគោលដែលអាចពន្លៀនចេញក្រៅបាន ដោយវាមាន Sensor ទំហំធំដល់ ១អ៊ីញ និងអាចប្រែប្រួល Aperture បានពី f/1.6 ទៅ f/4.0 និងមានបច្ចេកវិទ្យាទប់លំនឹង sensor-shift ថែមទៀត។
Pura 70 Ultra បានបំពាក់នូវកាមេរ៉ា Telephoto ទំហំ 50MP 3.5x ដោយវាអាចថតរូប Macro បានក្នុងចម្ងាយត្រឹម ៥ស.ម ដែលពីមុនត្រូវថតចម្ងាយ ១០ស.ម។ កាមេរ៉ា Ultrawide ក៏មានដែរ ដែលមានទំហំ 40MP។
![](https://cambobiz.com/wp-content/uploads/2024/04/gsmarena_009.jpg)
ផ្នែកលេចធ្លោផ្សេងទៀតរបស់ Pura 70 Ultra គឺមានថ្មទំហំ 5200mA មាន RAM ទំហំ 16GB និងអង្គផ្ទុកជម្រើស 512GB ឬ 1TB។
![](https://cambobiz.com/wp-content/uploads/2024/04/gsmarena_004-6.jpg)
អតិថិជននៅប្រទេសចិនដែលចង់កាន់ Pura 70 Ultra ត្រូវចំណាយចាប់ពីប្រមាណ ១៣៨១ដុល្លារ ខណៈ Pura 70 Pro Plus មានតម្លៃចាប់ពីប្រមាណ ១១០៥ដុល្លារ និង Pura 70 Pro មានតម្លៃចាប់ពីប្រមាណ ៨៩៨ដុល្លារ ឯ Pura 70 ធម្មតាមានតម្លៃចាប់ពីប្រមាណ ៧៦០ដុល្លារ៕