ក្រុមហ៊ុន HMD Global នៅតែបន្តចេញលក់ទូរសព្ទម៉ាកសញ្ញា Nokia ប៉ុន្តែទន្ទឹមគ្នានោះក្រុមហ៊ុនក៏កំពុងផលិតឧបករណ៍ដោយប្រើប្រាស់ម៉ាកសញ្ញារបស់ខ្លួនផងដែរ។ មួយក្នុងចំណោមឧបករណ៍ទាំងនោះ នឹងជាស្មាតហ្វូន HMD Pulse ដែលបានបែកធ្លាយរូបរាង និងលក្ខណៈសម្បត្តិច្បាស់ៗមុនការប្រកាសចេញ។
HMD Pulse នឹងប្រើប្រាស់អេក្រង់ IPS LCD ទំហំ ៦,៥៦អ៊ីញ ជាមួយកម្រិតបង្ហាញ HD+ និងមានគែមអេក្រង់កម្រាស់ស្ដើង។ ផ្អែកតាមការលេចធ្លាយពីមុនមក ស្មាតហ្វូននេះនឹងប្រើឈីប Unisoc T606 ជាមួយជម្រើស RAM 4GB ឬ 8GB និងប្រើប្រព័ន្ធប្រតិបត្តិការ Android 14។
ការលេចធ្លាយថ្មីបង្ហាញដែរថា ស្មាតហ្វូននេះនឹងប្រើប្រាស់កាមេរ៉ាខាងក្រោយទំហំ 13MP អមជាមួយមុខងារ AI និងមានថ្មទំហំ 5000mAh ហើយវាអាចជាបងប្អូននៃសែស្រឡាយ HMD Pulse ដែលនឹងមាន HMD Pulse+ និង Pulse Pro ផងដែរ។
គេអាចនឹងត្រូវរង់ចាំដល់ខែកក្កដា ដើម្បីបានឃើញវត្តមានស្មាតហ្វូន Pulse Series។ បើផ្អែកតាមផែនការរបស់ HMD នៅខែកក្កដាខាងមុខនេះ អាចនឹងមានការប្រកាសចេញស្មាតហ្វូនពីរស៊េរី ដោយនឹងមាន HMD Legend Series បន្ថែមពីលើ Pulse Series នេះ៕