ការលក់ iPhone របស់ Apple បានថយចុះជិត ១០% ក្នុងរយៈពេល៣ខែដំបូងនៃឆ្នាំ២០២៤នេះ។ នេះបើផ្អែកតាមទិន្នន័យចេញផ្សាយដោយក្រុមហ៊ុនស្រាវជ្រាវ International Data Corporation (IDC)។
តាមទិន្នន័យបានបង្ហាញថា ការលក់ iPhone ថយចុះពី ៥៥,៤លានគ្រឿង កាលពីត្រីមាសទីមួយនៃឆ្នាំ២០២៣ មកនៅត្រឹម ៥០,១លានគ្រឿង នៅត្រីមាសទីមួយ នៃឆ្នាំ២០២៤នេះ ដែលនេះជាការថយចុះ ៩,៦%។ ក្រុមហ៊ុន Apple មានការថយចុះខ្លាំងជាងគេក្នុងចំណោមម៉ាកទូរសព្ទកំពូលទាំងប្រាំ។
ក្រុមហ៊ុន Samsung បានទទួលតំណែងលេខមួយជាថ្មី ក្រោយពីចាញ់ដៃ Apple កាលពីឆ្នាំមុន ដោយនៅត្រីមាសដំបូងនេះ Samsung កាន់កាប់ចំណែកទីផ្សារបាន ២០,៨% ជាមួយចំនួនលក់ ៦០,១លានគ្រឿង។
គួរដឹងថា Apple ហាក់ពិបាកធ្វើឲ្យអតិថិជននៅចិនចាប់អារម្មណ៍នឹង iPhone 15 ចាប់តាំងពីការប្រកាសចេញកាលពីខែកញ្ញា ដែលការប្រកាសចេញនេះគឺក្រោយការប្រកាសចេញ Mate 60 Series របស់ Huawei ត្រឹមប៉ុន្មានសប្ដាហ៍ប៉ុណ្ណោះ។
ការធ្លាក់ចុះរបស់ Apple កើតមានអំឡុងពេលដែលទីផ្សារស្មាតហ្វូននៅត្រីមាសដំបូងមានការកើនឡើង ៧,៨% ជាមួយចំនួនលក់សរុប ២៨៩,៤លានគ្រឿង។ នេះជាត្រីមាសទីបីហើយដែលទីផ្សារស្មាតហ្វូនបានកត់ត្រាពីតួលេខវិជ្ជមាន៕