នាខែក្រោយនេះ Google នឹងចាប់ផ្ដើមបញ្ចេញមុខងារកែរូបភាពដំណើរការដោយបច្ចេកវិទ្យា AI ទៅកាន់អ្នកប្រើប្រាស់កម្មវិធី Google Photos ទាំងអស់នៅលើប្រព័ន្ធប្រតិបត្តិការ iOS។ នេះបើតាមការប្រកាសរបស់ក្រុមហ៊ុន។
មុខងារដែលមានឈ្មោះថា Magic Editor ដែលត្រូវបាន Google ផ្សព្វផ្សាយភ្លូកទឹកភ្លូកដីលើ Google Pixel 8 Series កាលពីឆ្នាំមុន បានប្រើប្រាស់ Generative AI ដើម្បីកែរូបភាពដូចជាបំពេញចន្លោះរូបភាព កែសម្រួលទីតាំងនៃ Subject និងបន្ថែមផ្ទៃខាងក្រោយ ឬផ្ទៃខាងមុខ ដូចជាបង្កើតជាពពក ឬធ្វើឲ្យផ្ទៃមេឃពណ៌ប្រផេះក្លាយជាពណ៌ខៀវស្រងាត់ជាដើម។
ពេលប្រកាសចេញកាលពី៦ខែមុន មុខងារនេះមានផ្ដាច់មុខតែនៅលើ Google Pixel 8 Series និងអ្នកដែលបានចុះឈ្មោះប្រើសេវាកម្ម Google One។ ចាប់ពីថ្ងៃទី១៥ ខែឧសភា មុខងារនេះនឹងមានសម្រាប់អ្នកប្រើប្រាស់ Google Photos ទាំងអស់។
យ៉ាងណា Google Photos សម្រាប់ iOS និង Android នឹងមានផ្ដល់ជូននូវការរក្សាទុករូបភាពដែលប្រើប្រាស់មុខងារ Magic Editor បានចំនួន១០រូបភាព។ ប្រសិនបើចង់បានបរិមាណលើសនេះ អ្នកប្រើប្រាស់ត្រូវទិញសេវាកម្ម Google One ដែលមានតម្លៃចាប់ពី ១០ដុល្លារ សម្រាប់ទំហំ 2TB ឬ ១០០ដុល្លារ ក្នុងមួយឆ្នាំ។
ក្រៅពី Magic Editor ក្រុមហ៊ុន Google ក៏នាំមកនូវមុខងារមួយចំនួនទៀតមកកាន់ Google Photos រួមាន Photo Unblur ដែលជួយកែរូបភាពព្រាល មុខងារ Sky suggestions មុខងារ Color pop មុខងារ HDR effect មុខងារ Portrait Blur មុខងារ Portrait Light មុខងារ Cinematic Photos និងមុខងារ Video Effects ផងដែរ៕