យុទ្ធសាស្ត្ររបស់ Apple ជាទូទៅគឺតែងតែបង្ហាញចេញពណ៌ថ្មីសម្រាប់ iPhone ម៉ូដែលថ្មីក្រោយចេញលក់បានច្រើនខែ ប៉ុន្តែសម្រាប់ iPhone 15 នាឆ្នាំនេះទំនងជាមិនទទួលបានពណ៌ថ្មីឡើយ។ នេះប្រសិនបើដំណឹងចចាមអារ៉ាមថ្មីចេញពីតំបន់អាស៊ី គឺជាដំណឹងពិត។
កន្លងមក Apple បានបន្ថែមពណ៌ថ្មីសម្រាប់ iPhone ម៉ូដែលថ្មី ដើម្បីបង្កើនចំនួនលក់ ហើយប៉ុន្មានឆ្នាំកន្លងមកនេះ Apple បានប្រើយុទ្ធសាស្ត្រជាញឹកញាប់។ តួយ៉ាងកាលពីឆ្នាំ២០១៧ និងឆ្នាំ២០១៨ បានបញ្ចេញលក់ iPhone 7 និង iPhone 8 ពណ៌ក្រហម ហើយកាលពីឆ្នាំ២០២១ បានបន្ថែមពណ៌ស្វាយលើ iPhone 12 និង iPhone 12 mini។
ចូលដល់ខែមីនា ឆ្នាំ២០២២ iPhone 13 ទទួលបានពណ៌ថ្មីដែលជាពណ៌បៃតង ហើយជាមួយ iPhone 14 និង iPhone 14 Plus វិញ Apple បានបន្ថែមពណ៌ថ្មីដែលជាពណ៌លឿង។
បើផ្អែកតាមប្រភពចេញពីបណ្ដាញ Weibo ចិន បានឲ្យដឹងថា Apple មិនមានគម្រោងប្រកាសចេញពណ៌ថ្មីសម្រាប់ iPhone 15 ឡើយ។ ទោះយ៉ាងណា គេនៅរង់ចាំមើលថា Apple នឹងបញ្ចេញពណ៌ថ្មីដើម្បីជម្រុញការលក់ iPhone 15 ឬយ៉ាងណា៕