Samsung Galaxy Z Fold6 នឹងមានទម្ងន់ ២៣៩ក្រាម ស្រាលជាង Fold5 ដែលមានទម្ងន់ ២៥២ក្រាម។ នេះបើតាមប្រភពគួរឲ្យទុកចិត្ត Ice Universe បានបង្ហោះនៅលើបណ្ដាញសង្គម X។
ពាណិជ្ជកម្ម
ប្រភពដដែលបានអះអាងទៀតថា Fold6 នឹងមានកម្រាស់ ៥,៦ម.ម ពេលបើកលាចេញ ហើយពេលដែលបត់វាមានកម្រាស់តែ ១២,១ម.ម ប៉ុណ្ណោះ។ ជាការប្រៀបធៀប Fold5 គឺមានកម្រាស់ ៦,១ម.ម និង ១៣,៤ម.ម ចំណែក OnePlus Open ដែលជាគូប្រជែងដ៏លេចធ្លោមួយ មានកម្រាស់ ៥,៨ម.ម និង ១១,៧ម.ម។
Fold6 នឹងរក្សាអេក្រង់ទំហំ ៧,៦អ៊ីញ សម្រាប់អេក្រង់ខាងក្នុង ខណៈអេក្រង់ខាងក្រៅនឹងមិនទ្រវែងដូចមុនឡើយ ដោយកាលពី Fold5 វាមានអេក្រង់ដែលមានមាត្រដ្ឋាន 23.1:9 ហើយ Fold6 មានមាត្រាដ្ឋាន 22:9 ហើយទំហំបានពង្រីកដល់ ៦,៣អ៊ីញផងដែរ៕